碧咸踢歐洲盃冠軍盃半準決賽，俾拉科魯尼亞球員（阿根廷籍）Duscher踢親對腳，經X光檢查，證實右腳腳面第二條跖骨（metatarsal）折斷，起碼有兩個月唔踢得波，碧咸多數會就此緣斷世界盃。腳面上有兩種骨，一個係連接腳踭與腳面嘅跗骨（tarsal），一種就係連接腳面與腳趾嘅跖骨，第二條跖骨係最長嘅一條，連接腳趾公，我哋知道踢足球要靠腳趾，跖骨斷咗，梗係唔踢得啦。
阿根廷與英格蘭同在一組，碧咸傷咗，阿根廷自然有優勢，不過阿根廷自己亦傷兵滿營，未必佔到好大便宜。
今屆歐洲盃冠軍盃決賽喺五月十五號在格拉斯哥舉行，如果由慶祝一百年會慶嘅皇家馬德里對曼聯嘅話，勢必轟動全球。但呢場比賽與世界盃相隔只係兩星期，到時呢兩隊打餐死嘅話，都唔知重會唔會有傷兵。譬如法國隊要祈禱施丹巴夫斯冇事，葡萄牙要望費高OK，西班牙更加吼實魯爾等西班牙球星；你話唔好彩嘅話，施丹、費高都傷咗，世界上最高身價嘅三位中場碧咸、施丹、費高都缺陣世界盃嘅話，國際足協唔頭暈就假。
就算所有球星都冇事，佢哋踢完聯賽，踢完五月十五號之後，會唔會筋疲力倦，到日本南韓打唔出水準呢，真係好難講。啲球星到七月先至真正有得休息，八月下旬聯賽又開鑼，做現代球星真係非如鐵人不可，賺大錢從來唔易㗎。