上個月長和系派成績表，和黃（013）盤數靚過市場預期，做68元，長實（001）盤數同預期一樣，做68.25元。和黃低過長實0.25元。
12日下來，外國電訊股唔妥，和黃跟住跌，𠵱家64.75元，長實則企定喺68.25元。和黃低過長實3.50元。
係時候博和黃反彈，揀和黃Call輪玩吓。和黃Call輪最熱門嘅係9050同9110。講數據，9110靚啲；講成交，9050優勝。
和黃低過長實，有機會追多少失地，唔等於長實一定會落後。大摩指數提高長實所佔比重，今日政府賣地成績估計唔差，都對長實有利。
長實Call輪，亦可以望多兩眼，最正路對象自然係交投最活嘅9063。
同和黃一樣，中移動（941）身為電訊股，近期亦都難逃一跌，跌到令人心淡，𠵱家22.95元，同上月派成績前比較，唔見1成。港股有望轉番醒啲，中移動追落後。
中移動守住23元，上望暫時不宜過高，24元差唔多。中移動1元波動，代表兩隻熱門Call輪9044同9029變化15至20%，細細注，買啲Call輪博反彈。