旺角新世紀廣場商場過去兩日擠滿人，到此逛商場者可能會打個突，難道香港人購物意欲大增？實情係大業主新地喺7樓賣長沙灣昇悅居，搞到經紀、準買家滿場飛，好不熱鬧。
而噚日下晝見周國賢一臉倦容，原來佢禮拜六晚賣樓賣到第二朝零晨4點幾，而當時場內重有準買家揀緊樓，耐力可謂驚人。
其實，禮拜六晚都有好多行家留守至零晨時份，看到唔少發展商及友好人士到場打氣嘅場面，好似信德高層就留到零晨1點幾先走，而2點鐘左右，恒基張炳強亦到場，在場內觀摩一輪之後，更同蘭西講，準備約埋班經紀一齊去食消夜。
新盤氣勢轉旺，跑新盤嘅經紀可謂久旱逢甘霖，唔少發展商為加快樓盤銷量，更新增設「跳巴制」，鼓勵經紀。好似喺九倉翠濤居內購表現突出嘅中原地產（圖），就成為首間獲發展商給予1.75%佣金嘅代理行，市場佔有率60%，真是可喜可賀。
蘭西