最近打開報紙，成日都睇到有人因抵受唔住壓力而自殺嘅報道。陳芷菁早排就俾國衛保險選為「SmartLady」，請佢出席喺會展舉行嘅講座，分享佢點樣逆境自強，做個新一代女性。
呢個講座馮仁昭都有去聽，席間陳芷菁重自爆當年因受唔住父母離婚打擊而情緒低落，更一度萌起自殺念頭。好在喺佢想做儍事嘅一剎那，突然諗起自己最鍾意食媽咪煮嘅燜冬菇，佢話即刻口水流晒唔想死。
聽落好似好搞笑，但陳芷菁話好多時就係一時間鑽牛角尖，鑄成大錯。芷菁喺講座中勸大家：「做人如果識諗啲開心嘅事，就可以推翻做儍事嘅念頭。好在當日我諗起碟燜冬菇，否則今日陳芷菁都唔會坐喺度同大家分享。」芷菁十五分鐘嘅樂觀演講，引得全場掌聲。
鄧健泓同傅珮嘉等人，噚日去咗尖沙嘴中港城出席「搖搖公開友誼大賽」。佢哋兩個雖然身為評判，但原來對玩搖搖一竅不通，認真搞笑。鄧健泓噚日重自爆係謝霆鋒歌迷，佢話：「我好鍾意聽霆鋒啲歌，希望廉署唔好冤枉任何人。」而身為張栢芝老友嘅傅珮嘉就話知道栢芝好獨立同醒目，所以費事打電話煩佢咁話。
早前張家輝四圍睇樓，有人報料就話佢兩年嚟不停咁睇匡湖居，但都未拍板買。噚日佢喺電視城開工，就承認自己想買樓，但係就睇唔啱心水。家輝話：「匡湖居我係有睇，不過係呢半年嘅事。我睇咗匡湖居超過五間樓，但係間間都漏水，我唔想畀多餘錢去整漏水。」
魏駿傑之前洗車整親條腰，又唔去睇醫生，搞到上個星期日起唔到身，女友滕麗名（阿滕）要call晒所有朋友送傑仔入醫院，留院三日，直至噚日先開番工。阿滕噚日喺電視城度話：「佢照咗X光，醫生話佢條腰骨其中一節歪咗，壓住神經線咪起唔到身囉。佢打算睇中醫推鬆條腰。」
鍾麗淇、鄧兆尊、湯盈盈、高志森、張堅庭同蕭亮，前晚喺無綫錄影《智在必得名人藝員慈善版》。喺一輪龍爭虎鬥後，最後由高志森勝出，贏咗十二萬一千八百蚊。佢當晚係代表公益金參賽，所以全部款項都會捐畀公益金。而鄧兆尊亦贏咗價值十幾萬嘅健身會籍。
陳果執導嘅《香港有個荷李活》，早前成為香港國際電影節開幕電影，但馮仁昭就買唔到飛去睇，前日百老匯電影中心就特別選映咗呢部作品放映五場，馮仁昭即刻去撲飛，點知五點幾去到，啲飛已經賣晒。梗係啦，導演陳果加上曾主演《蘇州河》同𠵱家亞視播緊嘅《橘子紅了》內地女演員周迅，又的確好鬼吸引。