信德（242）早前公布供股時，有老友同小初講，話隻股有得諗，結果就喺1.20元揸到家陣，以上周五收市價1.53元，計落都賺咗唔少，所以小初正諗緊，究竟先沽咗獲利，定係繼續揸住等供股。
小初打電話畀經紀陳問佢意見，佢話呢件事可以兩面睇，小初炒股票以短線為主，正所謂有胡唔食罪大惡極，家陣沽貨獲利冇錯。不過，自從Pansy姐掌門人地位確立後，連帶鬼佬證券行都對信德另眼相看，出報告話睇好，除咗繼續憧憬會增持澳娛股權外，亦認為地產收入將大增。
此外，信德剛宣布供股時，只係大量星洲買盤力吸，但家陣變成禾雀亂飛，有唔少外資行買盤出現，反映今次信德真係有機轉勢。雖然以陰謀論睇，唔排除想大家參與供股所以炒得咁勁，但睇落則夠晒誠意。
經紀陳話，總之一句講晒，如果小初唔等錢使嘅話，佢贊成繼續持有信德。
慕容小初