港股連跌兩周之後，今周有機會升番多少，但要上破萬一點，機會都唔係咁大。
上周五，美股納指彈升1.8%，紐約期油急挫5.6%；今日，本港賣地，大地產商摩拳擦掌競投，估計會有好成績；上周五盈富基金（2800）忽然售出14億元貨，日內相信去貨都會唔錯。呢啲消息，對短期港股會有幫助。
新世界中國（917）與新世界基建（301），近年走勢好難睇，不過跌到𠵱家個位，已經見底，近期已見收集迹象。
新中99年7月以9.5元招股上市，𠵱家2.2元，大散77%。股價大跌，但盈利則冇倒退，98年度賺1.90億元，至01年度有2.07億元，好過上市首年。今年上半年，賺1.01億元，升5%，大行平均預測全年賺3.02億元，大升46%，PE降至10.5倍。新中國內物業進入收益期，大行估計03年及04年盈利再增至3.81億元及4.92億元，PE再降到8倍與6.6倍。
新中PE就算唔算太低，每股資產淨值11.9元，股價折讓高達82%。就算細隻嘅中國地產股，都好難有咁大折讓率。
新基嘅表現比新中更差，95年10月以每股12.75元招股上市，到97年俾啲基金炒上25元，𠵱家淨番2元，先幾日低過2元創下歷來最低價。今年上半年，純利1.00億元，雖然較去年同期下跌72%，但同去年全年得1500萬元比較，已經超出5.7倍。為贖回可換股債券溢價撥備，唔係咁緊要，債券明年到期之後，再無撥備，盈利大增可期。今年盈利預測3.5億元，每股32仙，PE6.3倍。明年及再下1年，PE有機會續降至5倍與4倍。
與新中相同，新基折讓好大，每股淨值14.2元，股價折讓高達86%，較新中猶有過之。
新中同新基股價都已見底，畀耐性揸幾個月，等今年末期成績表派埋之後，賺5成以上機會好大。兩者之中，新基彈跳力勁過新中。
郭兆誠