又到換季季節，小妹妹穿上今季的喱士新裝後，當然要學媽咪一樣配番個至型手袋出街。雖然小童袋不像大人般走高貴的名牌路線，但今季卻以外形及圖案特別的斜孭袋為主流，當中又以貴婦狗造型最為得意過癮，以後小妹妹可將心愛的玩具及化妝品一併帶出街，唔使再勞煩媽咪！
記者：區佩嫦
攝影：林栢鈞
Model：霖霖
講到外形，呢個以貴婦狗造型的斜孭袋最有睇頭，皆因食正今年大熱動物形手袋的潮流。這個狗仔手袋用尼龍及毛毛製成，啡鼻子配上心形眼，樣子夠晒過癮可愛。小狗的背上更有手挽，可孭可挽，相當方便。小記認為，手袋用舊了，可將棉花放入袋內，便可搖身變成軟腍腍的毛公仔，絕對是小朋友出街及睡覺的良伴。
尺寸：13吋闊、8吋高、4吋深
售價：$490（ABEBI）
小朋友必定愛吃雪糕，不過媽咪總話吃得多壞肚皮，點算好？呢個袋就滿足到饞嘴一族，米白色的仿皮袋，前端縫上色彩繽紛加了櫻桃及忌廉的雙球雪糕，見到都覺得美味無窮，連小記都愛不釋手，何況係愛吃雪糕的小妹妹呢？
尺寸：3吋闊、7吋高、12吋深
售價：$295（HoneyB）
小妹妹最鍾意色彩繽紛的東西，這個尼龍手袋仔另有一條長孭帶，可孭可挽夠方便。七彩的顏色以條子交錯而成為格仔圖案，前幅除有七彩的仿皮花外，袋口更有藍底黃波波的花邊作點綴，充滿濃濃的夏天感覺，絕對是去沙灘的最佳選擇。
尺寸：9吋闊、7吋高、4吋深
售價：$390（ABEBI）
藤籃是每年夏天的潮流配件，今年小朋友亦可與媽咪一齊跟隨這股藤籃潮。這款藤籃袋用上淺色的藤編織而成，並配上可愛的小黑狗圖案，極富小孩的天真味道。袋口以紫白格仔的束袋設計，咁就唔怕心愛玩具不翼而飛啦！
尺寸：72吋闊、6吋高、3吋深
售價：$395（HoneyB）
不知小朋友會否像小記一樣愛看藍天白雲的風景，若你是其中一個愛好者，可能與小記一樣會愛上這個以藍天白雲作圖案的尼龍袋。粉藍色的天空加上白雲、太陽及彩虹圖案，絕對是世上絕佳的景色。全個袋另一特別之處便是孭帶布滿星星圖案，感覺恍如置身宇宙間。
尺寸：82吋闊、6吋高、4吋深
售價：$296（HoneyB）
其他精選
除了花外，夏天最當造的便是各式各樣的生果，這個腰包就以令人垂涎的蘋果、啤梨、士多啤梨做成，且串在尼龍腰帶上，造型絕對攞滿分，而且每個生果袋都可隨意移動，要喺邊個袋攞嘢都夠方便。
尺寸：每個4吋闊、42吋高、12吋深
售價：$335（HoneyB）
相信每位小朋友都愛畫圖畫，自認繪畫小天才，不如叫媽咪買呢個以繪畫畫筆作圖案的小背囊！這個尼龍背囊以特別的圓桶形設計，圓渾的外形配上鮮豔的對比色，搶鏡中又見可愛，最啱放各款心愛的畫具。
尺寸：52吋闊、9吋高、4吋深
售價：$250（COZCOZ）
小妹妹要陪媽咪去飲宴，自己當然要拎番個手袋仔啦！這個膠手袋仔，顏色夠晒Sharp，圓圓扁扁的外形，又夠Cutie，不過小記覺得最特別就係以透明膠做成的手挽，簡直可愛到極點。
尺寸：72吋闊、52吋高、22吋深
售價：$290（COZCOZ）
店舖資料
HoneyB（25060913）銅鑼灣時代廣場9樓903號舖
COZCOZ（23772121）尖沙嘴海運大廈011號舖
ABEBI（23773844）尖沙嘴海運大廈004-004A號舖