上星期《蘋果日報》娛樂版有一篇搶眼報道，就係「Nelson狂踩偶像二百萬Dior阿梅變短腳」，呢位Nelson據報道即係電影服裝指導兼時裝設計師張學潤。呢篇報道話梅艷芳在紅館首場個唱穿上三套Dior贊助服裝，張學潤彈三件嘢：（一）外套襯短裙闊到死，令阿梅腰長腳短；（二）旗袍花紋同顏色好似阿婆、cutting唔靚，着到成個知客咁；（三）牛仔布連身裙，好似牀單同睡褲。
咁批評法，刻薄兼抵死，相信梅艷芳唔高興之餘，Dior啲公關亦喊咁口，多得《蘋果》唔少！（相信《蘋果》廣告部亦會喊咁口！）公關靚女嘉倫睇完段報道，笑到㗎㗎聲。問佢點解咁好笑，唔通Dior係佢敵人乎？靚女嘉倫話：「唔係，做公關，點可以有敵人㗎！不過睇呢篇報道，讀者一定以為阿梅着嗰件旗袍都係Dior產品，其實邊度係吖，Dior食咗貓㖭。」左丁山將《蘋果》篇文章，睇來睇去，都以為件旗袍係Dior貨，乜係錯嘅咩？
靚女嘉倫話：「我都有去演唱會，好多觀眾都喜歡件旗袍，我哋覺得阿梅着得好有韻味，感覺同嗰位專家張學潤完全唔同。一個朋友夠八卦，周圍去打聽件旗袍係乜牌子，結果喺演唱會製作人員之中，聽到係BlancdeChine，唔係Dior。朋友再去BlancdeChine問吓，知道件旗袍布料係高級瑞士貨，出自蘇黎世布商JakobSchlaepher。我後來叫朋友睇《蘋果日報》張學潤嘅意見，朋友去慣歐洲辦時裝，佢話有啲似香港甲組球員批評碧咸唔識射自由球喎！