習慣咗喺米舖買米或要喺街市買餸嘅你，相信閣下可要改改以往作風，否則將會失去唔少利益。其實家陣唔少大型超市每星期均會推出一啲特定嘅減價貨品，當中貨品減價後重分分鐘平過街市。惠康本周就有泰國香米大平賣，只需一半價錢就有一包五斤裝米；十蚊都唔使嘅巴西全雞一隻，你又點可以錯過呢！精明嘅主婦們如果想月尾都有啲額外積蓄使吓，就要密切留意小記以下嘅精選推介。
記者：陳冰麗 攝影：陳穎
惠康由每個星期五起，一連七日即有唔同特價貨品推出，以下係小記嘅推介，泰國香米勁抵，買米重有醬油送，絕對唔可以錯過。
呢款泰國米，飯味夠香，質感軟糯。家陣可謂相當抵食，五公斤裝只係二十蚊鬆啲，比原價足足平一半，提醒大家特價由即日起至十八號止，要買好趁手。
食開金冠澳洲絲苗米嘅，本周亦有着數益大家，唔單止特價咁簡單，即日至十八日，凡惠顧絲苗米五公斤或八公斤裝，即可免費獲贈美極鮮醬油100毫升1樽，咁着數又豈可錯過呢！
淘大點心選擇多，梗有一款啱大家口味，當中包括有牛肉球、蝦肉燒賣、蝦餃、牛肉賣、蝦餃、鮮蝦韭菜餃等等，每款都只係$8.9，而且由家陣至下周五，重大贈送，買任何兩包淘大點心，即送多一包！
即沖飲品最為方便忙碌嘅都市人，值得推介呢款美祿三合一即沖營養飲品，特價平成半有多，而且買一盒重附送一個食物盒，更加係抵上加抵。
買雪糕亦有優惠，其中DREYER'SM&M'SSNICKER'S及TCBY低脂雪果或乳果就有買一送一大贈送，前者售$39.9/710ml，後者$45/437ml，有多種口味任君選擇。
天氣回暖，榴槤亦開始當造，家陣喺超市買榴槤重抵過街市價，每磅六蚊都唔使，重係泰國榴槤王金枕頭，質素佳，價錢又抵，鍾意食榴槤就啱晒。
飲品係夏天至佳良伴，本周惠康推出多款特價飲品，其中最抵飲嘅有呢款美國進口貨TropicanaTwister果汁，由原價$23.9減至只係$9.9樽，而每樽容量有1.75公升，有士多啤梨奇異果汁及香蕉橙汁任揀。
Sunkist250毫升罐裝橙汁及提子汁
Sunfill1.5公升橙汁或蘋果汁
青島大樽裝純生啤酒
由今日起至下周四，吉之島亦同樣有平靚正特價食品推出，留意住小記為大家精選推介，包保各位精明嘅主婦們年中可以慳番唔少私己錢呢！
呢度大部分蔬菜都係一包包Pack入袋內，種類超過十種，絕對唔少於街市買得到嘅，當中包括有紅莧菜、白莧菜、油麥菜、唐生菜、芥菜膽、通菜、菜心等等，每包大概半磅零重，任揀三種只係十蚊。另外，重有美國鮮蘆笋，原價要$17.9/盒，家陣只係$12.9/盒，約有五至六條，相當抵。
一包足足有2磅重嘅美國雞中翼二十蚊都唔使，重係來路入口貨，抵食之餘重食得零舍安心。
巴西雞，Size會比較細隻，每隻約重800克，但其肉厚且肉質滑，炒或煲湯都無問題，家陣食佢更加抵，每隻十蚊有找。
$10/6個
本周精選特價水果有呢款八十八裝新奇士鮮橙，十蚊有六個，大大個，食落清甜多汁，計落唔使兩蚊一個，抵！
售價$2.8/罐
呢款啤酒係德國進口貨，剛來港無耐，算係較新嘅一款啤酒，每罐330毫升，只售$2.8，新嘗試都幾抵飲。