蜜運中嘅情侶當真係「天涯海角若比鄰」？
財爺阿松呢幾日跟住特首去咗中國最南端嘅海南島公幹，但佢女友霞女就去咗祖國最北嘅哈爾濱，以微笑大使身分出席一個「尋找21世紀最美的微笑」頒獎禮，兩人一南一北，相隔千山萬水！不過，伏明霞前晚喺哈爾濱向記者自爆每日都同男友阿松通電話解相思，講到心上人，霞女成晚都掩唔住幸福笑容，怪唔得俾人哋請去做「微笑大使」啦！
霞女同記者講：「梁錦松有空的時候會來北京看我，每天我們都會通電話。」佢又話，對有關佢同男友拍拖嘅新聞報道睇得很淡：「我自己做的事情，隨別人怎麼說，只要自己開心就可以啦！」
阿松話過，打算一年後迎娶女友，前排復活節假又飛咗上京見家長，睇嚟打風都打唔甩，咁𠵱家喺清華大學讀緊經濟管理嘅霞女，畢業後會唔會作阿松嘅助手？佢話：「現在工作、婚姻暫時都不會考慮，主要還是先把功課做好，我把精力都放在學業上。」聽落，霞女都幾識諗，未有俾愛情沖昏頭腦。
E-mail：