周立璟同張惠妹分手後，分別同名模Danielle、AnaR.傳緋聞。前晚周立璟同AnaR.又不避嫌一齊出席喺演藝學院舉行嘅「Diesel2002春夏大型推廣活動」，Danielle亦同場出現，見佢滿場飛，一路煲煙，一路周圍同人傾偈，認真風騷。
周立璟同AnaR.一齊，見佢兩個都幾親暱，後尾AnaR.又坐埋一邊同啲朋友煲煙，記者影佢相，佢都好少理。
後尾Danielle同外籍朋友走咗去蘭桂坊蒲，有記者追住佢影相，點知Danielle向記者爆粗話：「Fxxxingphoto！」然後就嬲爆爆同一位黑人女子上咗部的士走咗。
日本樂壇天后濱崎步日前到台灣宣傳，由於耍大牌遲到，令台灣傳媒不滿。據台灣報章報道，台灣著名節目主持人陶子，為節目《亞洲娛樂中心》專訪步姐，步姐遲到一個半小時，而當陶子為步姐掛一個麥克風，亦俾工作人員以「會破壞濱崎步嘅『fashion』」而拒絕。而原先預設咗十二條題目，最後刪成四條。陶子對於無禮嘅態度，不禁喺節目中話：「這是我最後一次訪問濱崎步了！」
彭丹前晚喺灣仔漁人碼頭食飯，佢最近好少出嚟，原來喺內地搵錢。佢話上年喺內地拍咗百幾集電視劇、四套電影同三個廣告。彭丹豬籠入水，但身上嘅行頭就冇乜，彭丹話：「我反璞歸真呀，啲錢要嚟投資物業，我𠵱家有十幾間屋，北京、上海、深圳同香港都有，美國有五間㖭。」
影壇玉女同年輕偶像拍拖，佢個前度歌星男友梗係好嬲年輕偶像，話說喺舊年年中一個私人派對入面，年輕偶像已經當住男歌星面前同影壇玉女親熱，完全當男歌星冇到。其實佢兩個咁大膽都係因為飲咗酒，喺唔多理智嘅情況下，至咁唔畀面阿男歌星，卒之男歌星先會同影壇玉女分開。
舒淇頻頻有緋聞，好似佢同電影剪接師朋友一齊，令人以為佢有新歡，查實佢係做戲為自己解圍。早排佢俾傳媒影到又同黎明一齊之後，收到好多黎明fans嘅恐嚇信，為咗息事寧人，佢咪同剪接師出嚟扮係佢新歡。
謝霆鋒撞車搞到俾廉署查，馮仁昭都記得有個富豪嘅仔試咗部靚車，後來部車撞爛咗，警察到場了解之後，又報稱部車唔係個富豪之子揸嘅，不過唔知點解個富豪之子又咁大方，依然照買呢部車。嗰部車都係啲過百萬嘅靚車，富豪之子一早已經睇中，所以車撞咗，一樣照買。
天后女歌星俾男友飛咗之後，情緒一直好低落，佢啲老友好想介紹啲男仔畀佢，等佢唔使日日喺屋企喊，乜人打電話畀佢都唔聽。今次天后女歌星覺得好似俾人玩咁，癡心錯付，而且次次拍拖都要接濟啲男友，但到頭來都係一場空。
賈思樂噚日喺青衣城搞咗一個「賈思樂MyLoveForMusic迷你演唱會」，李樂詩、廖安麗同劉丹等都有出席。賈思樂話佢已經有六年冇出過唱片，加上近來又要落手落腳籌備呢個月二十七號嘅音樂會，所以足足瘦咗成十磅咁多。