自從盈富（2800）開售，個市日日牛皮，但筆者認為，港股落後其他亞洲股市太多，遲早有一日，盈富基金俾人一日掃光，個市抽鑊勁。藍籌中，我睇地產股有爆炸力，其中恒地（012）最有得諗。
地產商和政府軟硬兼施，力谷更多市民買樓，班大地主想輸錢都難。咁又係，唔保住佢哋，香港經濟真係唔多掂。
恒地出名派息高，隻股又比長實（001）、新地（016）乾，班基金掃起上來，一日升十多個巴仙唔出奇。在32元以下，值博率高。上星期五恒地成交成300萬股，係星期四嘅一倍，股價微升0.3元，收31.8元，看來時機快成熟，可以入貨。
個市得三隻恒地輪，論引伸波幅及成交，9272贏兩個馬位，上周五有200萬元成交，34.2%引伸波幅，比9074及9264低。9074年期最短，溢價也較低，上周五收0.183元，12.99%溢價。恒地6個月歷史波幅43.5%，12月股票期權35%引伸波幅，3隻輪的引伸波幅也算合理。 鍾斯