近排公司注資同埋賣殼嘅新聞，似乎日日都喺身邊朋友之間響個不停，主要相信都係國內同胞都想盡快將自己嘅公司喺香港上市，希望可以食正就快推出「北水南調」嘅政策。伏勝聽個做企業財務嘅朋友講，今次批國內同胞大多數都係靠國內地產發迹嘅，加埋佢哋喺國內有唔少地產項目，順理成章會搵番隻地產股嚟借殼上市。
個朋友重同伏勝講，呢班大陸客非常之麻煩，睇咗好幾隻都話唔係好啱，唔係話隻殼太細，就係話隻殼「唔多乾淨」，不過因為佢哋非常之叠水，所以做企業財務嘅人通常都會拿住幾隻殼股畀個客揀。單單呢一排傳緊有機會成為殼股嘅公司，就已經有一大叠，其中更包括隻愈潛愈有嘅金朝陽集團（878）。
金朝陽呢隻股仔上星期五收4仙9，市值得番1.53億，啱啱合正班大陸客嘅口味，聽講已經有人喺度搭緊線，希望可以將佢哋拉埋傾偈。大家不妨留意一下呢隻股仔，或者可以搭一程順風車都唔定。
早前動作多多嘅科達集團（673）喺四月頭橫行咗成個幾星期後，似乎又想再發力，唔單止呢排成交額開始多番，睇番紀錄，科達嘅主席更喺3月20日行使認股權，增持多4000萬股，加埋今年其他相關人士共增持咗2.3億股，睇嚟公司內部對呢隻股嘅前景非常樂觀。
聽講佢哋喺今年1月入股咗個韓國網上娛樂公司之後，嗰邊嘅生意非常唔錯，尤其係網上博彩方面，唔使點再使錢就可以收到每單博彩交易嘅2%作為服務費，分分鐘好搵過喺濠江開檔，所以有意繼續添食，希望喺個本業唔係幾得嘅時候，都重有發圍嘅機會。聽得線人朋友講，今次隻股就世界盃賭波熱潮，分分鐘可以翻一番㖭。 伏勝