老董會搵邊個「外援」入政府重未揭盅，但八方從各方收料，行會成員唐英年怕且都冇乜走雞。如果係真，一向着重家庭生活的唐公子，要平衡家庭生活同公職都幾高難度，不過唐公子噚日上商台節目接受「阿旦」鄭丹瑞訪問時就爆料話：一切靠垃圾桶！
唐公子話，佢一早承諾要參與子女成長，所以安排每日行程已經成為「藝術」，佢放工會避免直接去應酬，盡量返屋企睇吓仔女。佢又話，唔好將工作不滿帶返屋企：「我建議喺屋企門口放個大垃圾桶，每日喺個垃圾桶前停一停，將唔開心谷氣嘢拋晒落個垃圾桶先，唔掂就搏命踢個垃圾桶，踢到垃圾入晒去，所有唔開心、煩嘢丟晒落垃圾桶先！」
另外，唐公子好飲紅酒係人都知，原來佢喺美國讀大學時，因為同朋友去飲嘢傾偈，飲啤酒一杯起兩杯止，飲烈酒一杯就暈，飲橙汁又好似唔係咁好，所以開始飲葡萄酒，點知一飲就到𠵱家。佢又話今日科技先進，平價酒、中價酒質素分別已經唔係咁大，佢就鍾意大眾化少少中價酒：「要試過支酒，未出名之前，發覺幾好飲喎，就去買，到俾人發現咗，變到好貴個時，份滿足感好大。」
（圖）唐英年靠垃圾桶平靜心情。
E-mail：