讀者Samson問：本人最近購買咗一部二手車作座駕，請問何時需要換電池呢？最近又發現頭燈時光時暗，有如此情況出現，其實係唔係電池出咗問題呢？
Samson：首先，如果頭燈喺引擎啟動後，仍時光時暗的話，就應該與電池無關，而係發電機嘅輸出功率問題；若要試電池好與壞，只需撻車前亮着頭燈，然後再啟動引擎，睇吓頭燈在撻車時係咪暗咗好多，如果太暗的話，即係話電池可能需要更換。
而現時市面上嘅汽車電池，係分開入水同毋須加水兩種。當中入水電池嘅好處係電流輸出較大，適合歐洲車使用，但缺點係要經常加水，就算汽車沒有開動一段時間，由於蒸發問題，車主都必須每個月加水一次（蒸餾水或電池水亦可）；至於毋須加水嘅電池，好處係體積較細及毋須加水，而喺電池頂部更設有一指示燈，綠色代表有電，當轉為紅色時車主便需將之更換，對一般香港車主嚟講，呢種毋須加水嘅電池，絕對稱得上係方便。之不過，市面上一般細體積嘅毋須加水電池，電流輸出會較細，只適合引擎容積較細嘅家庭房車使用，所以大家應緊記呢個要點。
如大家對汽車有任何問題，可傳真至27420542，或郵寄至香港將軍澳工業邨西駿盈街八號，《蘋果日報》副刊「車天車地」版「汽車Q&A」收，我哋會盡快為你解答。