如果你係一個冠軍練馬師，你會喜歡捧着個國際級賽事的獎盃，定係做一個小議會的主席呢？最有「食力」的簡炳墀就會話，佢兩樣都要！
話說由鄉議局成立到𠵱家，都同佢玩對抗的新界原居民議會，今個月二十一號就會搞個盛大的就職典禮，在元朗兩個相連的球場擺幾百圍盆菜宴，推舉簡炳墀做個議會的主席。
雖然，議會請了林煥光同李麗娟去捧場，但係兩個都不約而同唔到。民政事務局發言人噚日話，林局長有事在身，抽唔到時間；而民政事務總署就話「眾人媽打」當日已經開始放大假嘞。不過唔緊要，議會請到簡Sir的老友李鵬飛同鄧兆棠主禮，分量都夠啦。
另外，簡Sir當日下午要趕去沙田馬場，事關當日有愛彼錶女皇盃的賽事，呢場係國際一級賽事，梗係唔少得簡Sir份，佢馬房當日就有兩匹馬落場競逐錦標，包括上季贏咗香港打吡冠軍的「實業先鋒」，同埋由許晉奎做馬主的上季皇太后盃盟主「神彩金剛」。
究竟簡Sir當日點樣可以連走兩場，短短時間之內穿梭沙田同元朗呢？八方真係想像唔到。
不過如果佢真係可以先捧女皇盃，再去就職做主席，到時就真係威到盡嘞！
（圖）「食力簡」上季憑「實業先鋒」捧走打吡冠軍，未知今次能否先捧女皇盃，再去就職做新界原居民議會主席威威？
E-mail：