盈富基金（2800）銷情終於轉佳，單日售出1.31億個單位，似乎後市又唔算太差。噚日恒指一直守住10630水平跌唔穿，最後更重上10700以上收市，跌幅收窄至34點，成交57.44億元，計埋盈富銷售額14億元，總成交超過70億元，都算唔錯。Cookie話，收到料美股可能會挾高，所以有人買定貨先，至於美股因咩事造好，佢都唔太清楚，照計暫時美股都係乏善足陳。
唯冠國際（334）噚日晨早有一手大額成交6000萬股上板，每股作價0.78元，其後股價勁升13％。市場人士初時重以為有人批手貨畀莊家然後造上去，的確係有股東批咗手貨出街，不過唔係用作炒上獲利，而係裕元（551）旗下公司減持畀配售代理幫佢散貨，結果早上嘅升幅幾乎一筆勾銷。
市場集中炒新股，最近獲得生產藍貓成衣品牌專利嘅德發集團（928）正籌備上市，招股總數達3.2億股，其中配售佔2.56億股，公開認購6400萬股。據聞配售反應不俗，傳以每股0.385元定價。
藍貓係國內對抗西方卡通侵略嘅產物，有消息話上市後會大炒特炒，聽講有唔少中資已經部署炒賣此股。德發月底正式上市，不妨留意吓。
太平洋興業（166）下周一將復牌，有人出每股１仙提出全購，較停牌前收市價大幅折讓97.5％，大股東當然唔肯制，不過無情情有人提出全面收購，而且作價重咁低，似乎冇誠意。黑客話畀阿虎知，市傳此股真正控制權可能已易手。 阿虎