近日是非纏身的謝霆鋒竟又惹上官非，於昨日凌晨時份被ICAC（廉政公署）拘捕，事件震動娛樂圈。一度與霆鋒傳不和的王傑和陳曉東，昨日被問到有關霆鋒被捕事件時，東東竟說：「大家可以放鬆啲！」東東此言未知是攞景還是贈興。
謝霆鋒因上月於紅棉路發生的一宗交通意外中，懷疑有人妨礙司法公正，昨日凌晨被ICAC（廉政公署）拘捕，全城立即轟動。
霆鋒事件全城關注，但一度被傳與謝霆鋒不和的陳曉東（東東），昨日往尖沙嘴海景嘉福酒店，出席由texwood舉辦的『陳曉東展現非凡牛仔魅力』活動時，被問到霆鋒事件，東東竟叫大家「放鬆啲」未知東東是有心攞景還是贈興。
東東初時與大會司儀傾談時，還一臉輕鬆，但當記者告訴東東昨晨霆鋒被ICAC拘捕，及據稱霆鋒更在東東前度女友張柏芝大埔康樂園的寓所被找到時，東東即時收起笑容，一臉嚴肅地說：「我覺得我唔方便講任何嘢，但係我想講，大家可以放鬆啲，我一路以嚟所做嘅每一件事，都係希望分咗手都可以繼續做更好嘅朋友。」問他可會致電問候柏芝，東東說：「我唔選擇同媒體講。」
至於東東被問到當日與柏芝分手，負面新聞不絕於耳，現在他可有感到雨過天青？東東說：「希望係天晴，唔係行雷落雨，無論彎路直路都唔後悔，拍拖係要講緣分。將來我再拍拖亦唔會怕，不過呢樣嘢唔可以強求同埋一廂情願嘅。」
而同樣一直被指與霆鋒不和的王傑，昨日返電視城拍攝電視電影《血殺》時，記者還未開口問他對霆鋒一事有何看法，他已一臉驚慌地搶着說：「乜事呀，我乜都唔知㗎。」
但問到王傑英皇娛樂老闆楊受成是否牽涉其中時，王傑卻漏了口風說：「楊生？佢冇事呀！哎，我真係乜都唔知，我乜都唔敢講，次次答完啲嘢，第日報紙寫出嚟都係兩回事。」想不到一向敢言的王傑，今次竟然封口不談霆鋒。
此外，身為霆鋒前度女友的趙學而，昨日獲悉霆鋒被捕一事時表現擔憂。學而昨日在電視城拍攝劇集《皆大歡喜》，問她有關霆鋒被ICAC拘捕一事時，她大感詫異說：「吓？咁大件事？我冇收到消息，唔知發生乜事，對呢件事亦都冇乜意見。」問學而可認為霆鋒近日是非纏身？學而說：「娛樂圈係是非圈，希望佢盡快冇事啦。」
而霆鋒另一舊愛戴辛尉，昨日得知霆鋒出事大表錯愕，並即時為他以塔羅牌占卜。
戴辛尉初時在電話中說：「我唔知佢發生咗咁嘅事，等我了解咗先再講。」稍後記者再致電給她，戴辛尉說：「我𠵱家玩緊塔羅牌，唔方便做訪問。」
王菲的經理人陳家瑛昨日透過電話說：「人哋嘅嘢，我哋唔表態亦唔回應。」
霆鋒、柏芝及楊受成生肖同屬猴，李丞責表示若三人生肖太相近，會出現排斥，影響運勢。不過他說霆鋒接二連三遇上運滯事，非因緋聞女友柏芝剋住所致。而是霆鋒命中在駕車或買車都要小心。
李丞責說：「佢今年入咗孤星同指背星，即係好多是非兼被人篤背。今次單官非會喺夏天呢幾個月較為纏繞，出埠避一避就好啲，若不能外出，最好去北帝廟拜一拜。不過佢過咗生日就會行一生中最旺嘅運，應該可以吉人天相。佢最好着藍色嘅衫，忌着黑同黃色。佢忌金，所以霆鋒鍾意戴嘅銀器其實唔係幾佢，應該改戴水晶。」
採訪：卓美娟