呢個星期Game場靜到飛起，全個星期都冇乜大作推出，一片死寂，搞到Game舖都嗌晒救命！
不過鐵人最近收到風，可能PS2嗰邊見大家咁渴Game，打算將隻《WinningEleven6》提前喺4月25日推出，重要比日本本土快少少！儲存媒體唔係Game場普遍傳聞嘅DVDROM，而係用番較低容量嘅CDROM。同日GBA版嘅《WinningEleven》都會一齊上市，不過批發方面透露，今次貨量嚟得好少，見到就要快啲買喇！
DC嗰邊呢期最紅係隻《GundamDX》！不過聽聞佢來貨量都係好少！想買就真係要趁快手，費事好似隻《櫻大戰4限定版》咁，升到成千銀就喊都無謂！𠵱家DC版《GundamDX》嘅街價約$400左右，至於隻《櫻大戰4限定版》街價升到大約$980左右。
呢幾日鐵人行開「黃金」，俾我發現有全日本製造嘅GBA賣，賣價大概$480，有興趣可以諗諗，而GBA新Game方面，今個星期返咗隻《Luner》，街價大約$320左右。
前排MircoSoft喺香港開記者招待會，並表示會引入行貨版XBOX，不過暫時連返日版定美版都未知，相信大家重要等等；另外，Panasonic嘅Q新機，日本方面最近又重新出貨，市價約$2,900，大家買機前不妨參考吓呢個價。
前幾日鐵人行經銅鑼灣SONYPROSHOP見到唔少Game都做緊大特價，好似《ICO》就做緊$200鬆啲，而隻音樂遊戲《BravoMusic》就平到$100有找，如果你有好多舊Game都未買，一定要趁機上去Look吓！
另外，年頭推出嘅《FinalFantasyX》國際版，下星期會有台灣行貨到港，據批發方面透露，零售價約略低於$300，足足比日本版平$100有多，想買嘅不妨等一下！
另外，喺5月2日推出嘅PS2《2002FIFA世界盃》，亦會有行貨推出，估計售價應該會同《FinalFantasyX》相若。
文：打機鐵人