做咗少奶奶嘅施念慈，下個禮拜就會推出一本講美容同keepfit嘅新書，裏面重訪問咗陳芷菁、任葆琳、歐陽妙芝同埋張學潤，分享佢哋嘅keepfit心得。
今次施念慈呢本書係由一個減肥食品牌子贊助，聽講佢寫書嘅酬勞有成六位數字㖭！馮仁昭第一時間向施念慈求證，佢話因為下個星期二有新書發布會，所以𠵱家暫時唔講得住喎！而呢間減肥食品公司為咗保持神秘，都唔肯透露本書嘅詳細內容。
馮仁昭聽聞歐陽妙芝𠵱家學緊瑜伽keepfit，佢重好勤力，一個禮拜上兩三次堂；而陳芷菁就用針灸同埋睇中醫食中藥嚟調理身體。
至於呢個減肥產品之所以搵施念慈寫書，除咗因為佢係新晉女作家，佢結婚之前靠做運動同埋節食成功減咗十磅，亦絕對係keepfit嘅成功例子！
溫兆倫同唐寧噚日為無綫劇集《華克探案》拍攝外景，劇情講述唐寧被綁架，困喺一間屋仔入面，後來屋仔着火，好彩得溫兆倫拯救佢出嚟。唐寧有部分戲分堅持自己上陣，佢話：「我都係第一次同火咁近距離拍戲，好多煙，導演要我扮咳都唔使，真係發自內心咳出嚟！」
何超儀日前出席完英皇三周年記者會後，隨即往泰國為修身堂拍全新一輯廣告，佢會喺泰國逗留四天，超儀話：「今次廣告主要show身材，所以都會性感，而公司已經幫我定咗底線，會着BraTop襯熱褲，下身會披上一件紗。」不過超儀怕走光，堅持唔着三角褲上陣。
馬德鐘噚日喺柴灣拍Ultrasonex超聲波牙刷硬照廣告，佢不忘向記者硬銷一番：「我已經用緊，真係好乾淨，又唔係好貴。」馬德鐘重話：「咁啱得咁蹺，遲啲可能又會拍個關於牙科診所嘅短片，如果有人想拍牙膏廣告，都可以搵我。」而今次嘅酬勞佢都好滿意。
多首名曲都俾鄭秀文翻唱過嘅韓國女歌手李貞賢，前日坐車途經漢城京釜高速公路，同貨車發生嚴重碰撞，李貞賢坐嘅車變成廢鐵，好在佢扣咗安全帶，只係撞傷喉嚨、膊頭同腰。李貞賢其後被送入醫院照X光，雖然佢當晚堅持出院做騷，但到咗深夜要再次入院作詳細檢查。
二人組合Twins今個月三十號將會響大會堂舉行《CrazyFMCrazyFansTwins世紀音樂派對》，當晚重會帶埋師弟周英杰出場見吓世面。不過最有創意都係搵咗葛民輝做監製，希望可以為觀眾帶嚟一種全新嘅表演方式，當晚會以樂隊作伴奏，重會大唱其他歌手嘅歌㖭。