春回大地，濕濕𣲷𣲷嘅天氣，搞到個人無心機做嘢，呢個時候最需要飲番啲祛濕茶或湯。老黃瓜具有消暑祛濕功效，用佢配合豬踭、赤小豆、眉豆煲湯飲，利尿又祛濕，想功效更顯著，記得刮去籽後連皮一齊煲。
剛上市嘅老黃瓜略為貴少少，遲多幾個禮拜，老黃瓜貨源多嘅話，其實四、五蚊斤都可以買到！細小或中型老黃瓜品質較佳，瓜瓤較少，食落亦較甜㗎！
最近嘅魚，比較蝦蟹更當造，所以魚嘅選擇更多，我肥師奶今日要推介畀大家嘅就係冰鮮青根馬頭。
馬頭魚個樣好易認，頭部方方鈍鈍似一張馬面。𠵱家嘅青根馬頭數量多，但每條魚都唔會特別大條，約八両至一斤左右，價格屬於中等。馬頭肉質爽而帶滑溜，最啱煎嚟食，香口又嫩滑。我老公重話啱晒送啤酒㖭！