除咗「薛嘟時」對關刀外，呢期最多人搵應該係對DunkLowPro。美國嗰邊啱啱出咗批板仔牌子特別Air版，喺網上炒到㷫烚烚，好幾次都聽到有人去水貨舖問有冇貨返，個勢好似好掂。
波鞋街訴苦Sam卻唱反調，話DunkPro睇嚟最多玩到9月。「收到風9月份，歐洲會一口氣出15個色，到時只怕貨多到水浸，供過於求就冇得炒，走貨嘅又要發掘新星接棒。」
訴苦Sam永遠悲觀，其實多貨出未必一定炒唔起。過去例子，睇吓「科時溫」，顏色多到鞋舖貨架都擺唔晒，但價錢仍企硬九百以上，高過原先零售價。「爛泥」重企硬過千，大把人搶。訴苦Sam：「冇錯仍然賣到，但款多一定拖散個價，本來賺足一倍，到時只剩幾成，冇咁好做。」
不過，對大公司嚟講，炒到幾高只係其次，最緊要係滲透率高，所以出成15個色一個鞋款，總有佢嘅道理。今時今日，邊有容易錢搵？惟有薄利多銷，炒貨亦不例外。
主持人：大食Jack
八卦熱報：