業績唔係特別正，但股價近日升到暈嘅唯冠國際（334），噚日忽然出現大手成交，原來係第二大股東裕元集團（551）減持。經紀黃話，唔好以為係有人睇淡，批貨分分鐘落入強者之手，到時就真係高處未算高。
今次裕元係以每股78仙，減持6000萬股或9.44％權益，賣完之後重有14.84％權益咁多。出現呢手大成交後，隻股一度炒上去92仙，收市報82仙，微升1.24％。
經紀黃話，雖然唯冠早排公布業績盈利急跌，但有芬佬表示，最壞嘅時間已經過去，唔排除會喺明年復甦，加上同類股冠捷科技（903）深受基金追捧，所以亦有芬佬睇起唯冠。
今次有人肯大手向裕元要貨，係一個好兆頭，唔好以為係裕元睇淡。
另外，噚日講起大摩唱好歐亞農業（932），原來唔只睇好咁簡單，好似幫埋歐亞做路演，向一眾芬佬推介咁巴閉。 慕容小初