美股呢個禮拜走勢認真反覆，日日都大上大落，在呈現超賣嘅情況下，淡友仍敢於出擊，唔通美股真係未調整完？
港股噚日走勢相對硬淨，午市喺地產股帶動下，收復大部分失地，只係跌34點。下周一港府今個年度首次賣地，市場預期成績理想，可為庫房帶來26億元收益。
噚日明顯有買盤偷步吸納地產股，長實（001）、新地（016）及恒地（012）等皆造好，其中長實預計會受惠於5月大摩指數執位，近日走勢明顯優於大市，睇嚟趙飛雲要低吸長實輪嘅如意算盤可能打唔響。不過自開倉以來，玩親藍籌都全部損手，可能買唔到係好事。
噚日佑威（627）初段稍試0.65元，就調頭回升，趙飛雲要追到0.67元至買到，同上次嘅買入價一樣。贏開嘅股票有感情，希望佑威真係震完倉就炒上，升破0.76元可見0.81元，跌穿0.65元就止蝕。
前日提過嘅光通數網（155）噚日以大成交升破10日線0.018元，收0.019元。不過趙飛雲唔想供股，所以都係只睇冇買，睇埋下周除權後股價表現先至諗。 趙飛雲