陳任寫食經飲經，大家睇得多，前年亞視有個午間節目，搵陳任下廚做菜，針對婦女時間，收視率好似有兩三點，估唔到亞視結束咗陳任嘅節目之後，𠵱家無綫電視竟然會搵佢主持一個全新嘅節目，叫做《名人飯局》，逢星期六晚（今晚首播）九時三十五分播映。無綫素來有慣性收視，睇怕陳任呢個節目嘅收視率會有二十點以上，比以前增加十倍，套用一句黃霑講《獅子山下》嘅用語，陳任呢次鹹魚翻生，掂硬。
陳任資格有幾老呢？佢喺電台做DJ，專播舊歌，一位年輕少女喺電台門口追住佢要簽名，陳任心中暗喜：「我重有靚女fans。」點知少女同佢講：「我阿媽細個時候就鍾意你，佢叫我搵你簽名。」無計啦，資格係老啲，但老而彌堅，陳太好鍾意，而且有如遠年紅酒，愈老愈醇。
呢個《名人飯局》節目專門講飲講食，第一集就搵到周梁淑怡到鏞記食燒鵝，黃毓民及查小欣到君悅酒店「鹿悅」試日本菜；將來就會到半島酒店嘉麟樓、淺水灣Vernadah西餐廳、香格里拉Petrus……都會同名人一齊去食，一邊食一邊講廚藝秘笈。重會搵埋影視紅星親身示範獨家拿手好菜㖭。
一班陳任嘅損友為佢度咗一條收視絕橋，睇佢敢唔敢試，就係陳任璩美鳳共飲鹿茸湯，席設台北來來大飯店套房；與神童F試避風塘遊艇私家雞，做得出嘅話，收視會有三十六點！