新登場：
高檔西餐煮入葵芳

隨着本地交通路線的四通八達，銅鑼灣的美食一哥地位，怕且有點危，君不見新食力正向四方八面進攻嗎？新張的高檔西餐選址葵芳，交通便利嗎？從中環出發約15分鐘便到埗。在這裏你享有較鬧市寬闊的飲食空間，菜式的味道和賣相，有五星級酒店出身的廚師替你安排，你唯一要做的是享口福，並請謹記，今後搵食眼光要放遠點。

記者：楊一凡
攝影：林栢鈞

香草鮮雜菌莧菜釀香燒澳洲羊鞍$145 大廚推介
新鮮嫩滑的羊鞍只要小量調味便可放上烤爐，烤至七成熟左右，不讓肉汁流失，伴焗原個蒜頭及多款炒香的菌類便可上碟。埋身睇真啲，𠵱，羊肉加咗料喎！那其實是炒香的莧菜加鮮白菌碎，把它們釀入羊肉裏，既可索肉汁，又可點綴菜式。

總廚試味： 其實五成熟的羊鞍肉味至香濃，而肉汁又最豐富，燒汁是用羊骨及香草熬製，可以帶出肉香，要加倍香濃的話，把焗熟的蒜肉塗滿羊鞍，大啖咀嚼亦不錯。

香煎法國鮮鵝肝配蜜糖汁$88
鮮鵝肝膩如牛油，讓它跟平底鍋面貼面，最終會溶為鵝肝油，所以大廚在煎鵝肝前先撲粉底──麵粉，然後才香煎，為了令底面同樣金黃潤澤，煎時要來一個鯉魚翻身，平日少運動的鵝肝被這一折騰，變得全身無力，乖乖躺在蘋果茸上，任你宰割。

廖先生試味： 鵝肝煎得好香口好滑溜，淨食會好滯，不過伴酸甜的蘋果茸，就剛好。呢處餐包花款多又軟熟，鵝肝伴黑麥包或莧菜芝士包都幾好味。

燒釀田螺香草美國豬柳$98
淡而無味的豬柳，是肉類中的大悶蛋，酒店出身的廚師卻想到用惹味的田螺去打破悶局，先用燒汁和紅酒去燴田螺，然後加洋葱和香草炒香；另一邊，把一大塊豬柳攤開，讓切碎的惹味田螺鋪個滿面，跟手捲成長筒，用繩縛好，煎熟切件上。

試味報告： 有餡豬柳果然「味」力不凡，清淡的肉味讓田螺全力發揮惹味小宇宙，濃味的燒汁卻又帶出丁點豬肉香，連味覺上都做到有前有後。

雜菌沙律$48
雜菌包括蠔菇菌、日本鮮冬菇、鮮白菌及金菇，為了保留原味，統統不用出水，只要全身沾了黑醋汁後，便可放上扒爐烤，快手快腳一個轉身，就伴着嫩口的沙律菜，清爽地出場。

黃經理試味： 雜菌清淡又有營養，是女士們的至愛之選，用黑醋汁取替沙律醬，目的是想減低肥膩的感覺。

HappyHour$88/位
逢星期一至五下午三至七，一口價$88，任點任飲全店雞尾酒、烈酒、啤酒、汽水、招牌紅、白酒，嫌齋飲無癮？餐廳有免費小食如春卷、咖喱角和炸薯角等供應，雞尾酒每杯至少$45，任飲之選除咗LongIsland等例牌以外，連西班牙Sangria也包括在內！學酒保亞Joe話齋：「搭的士嚟飲都抵。」

試味報告： 奶綠色招牌雞尾酒BistroM是用白薄荷和綠薄荷甜酒，加名牌呍呢拿雪糕混合而成，呷一口，涼到入心；其他的飲品均見水準，不會稀如白開水；免費小食勁搶手，請耐心等候。

店名：BistroM
電話：24011917
地址：新界葵芳新都會廣場五樓531至540號
座位：80個
營業時間：早上11時至晚上11時
付款方法：現金及信用卡（A.E.,Diners,Master,Visa）