隔晚美股出現近期少見跌幅，杜指挫206點，納指跌41點，標普散26點。但港股反應似乎相當溫和，恒指最低時只係下挫114點，到收市時更只係唔見34點。
指數雖跌，下跌股份數目少過上升股份，大約係1對1點1，屬於好現象。不過即月期指由高水轉為低水，低水60點，5月期指低水78點，又令人對大市有啲戒心。
杜指前晚收10176，已抵近期底部，若然試底成功反彈，恒指10700水平可守，但要有大作為則亦唔易，盈富基金（2800）嗰批四十幾億貨尾，未清晒之前，恒指都好難有機會上得番萬一點以上。
昨日比較硬淨嘅藍籌股，主要係地產股。4大領導地產股中，新地（016）、長實（001）、恒地（012）都有得升，獨新世界（017）下跌，但亦只係微跌5仙，收6元。
新世界近年落後大市同其他地產股，跌至6字關口，已唔適宜睇得太淡。大市一旦回升，新世界中線可重上7.20元。新世界現年度上半年，純利10.35億元，較去年同期大增2.3倍。業績咁勁，原因係上年出售麗晶酒店之盈利20億元入帳，減去呢部分盈利，上半年實際有赤字，而有赤字之原因，則係為地產項目撥減值準備7.1億元。喺有特殊盈利情況下大撥備，對明年及以後業績會有幫助。今年全年盈利預測17.5億元，每股0.68元。現價PE8.8倍，往績PE60倍已經冇乜意義。
可以「頂住」新世界股價之另一項條件，係每股帳面淨值高，達到26.91元，股價折讓達78%。有啲大行自己估過新世界資產淨值，打個折扣，即使係咁，折讓率仍然喺6至7成以上，好吸引。新世界旗下之新世界中國（917）同新世界基建（301），股價較淨值亦係有好大折讓，下星期一再講。 郭兆誠