美股隔晚大散，但港股昨日走勢較預期佳，恒指只係縮水34點。下禮拜一賣地，似乎唔少人睇好賣地成績，地產股跑贏大市。
新地（016）帶頭，收59元，升75仙。市場人心虛怯，但如果夠膽低價撈貨，一樣有魚有肉，例如新地最低做57.50元嗰陣，夠膽低價買Call輪9115，只係29.5仙，到收市35.5仙收割，原來已有2分錢利潤。
恒地（012）收31.80元，升30仙，升幅小過新地，但叻過長實（001）同新世界（017）。
長實Call輪9063升1.5仙，收32.5仙。若然喺最低之時上車，成本只係28仙，尾市埋單有18%利錢。
恒地升，但啲恒地Call輪冇乜買賣。新世界微跌，啲Call輪又係好少成交。博地產股有得去，玩地產Call輪，不離新地Call輪9115同長實Call輪9063。
電盈（008）近排叻過其他兩大電訊股，昨收1.97元，微跌1仙，電盈Call輪9111企定喺24.9仙。正股守得穩，未來反覆向上，可以收集啲，上望分半錢利潤。 章盛