最近，Nokia推出了八達通手機殼，可惜暫時只限3310或3330兩個舊機款。其實坊間早有舖頭自行改裝八達通手機，改裝後搭車搭船一樣掂。不過，原來自行改裝八達通都有大把手尾跟，所以大家真係要諗清楚！
記者：董峰
攝影：陳智良
ImageGirl：Monique
Nokia與八達通有限公司聯手推出的第一款八達通手機外殼，只適用於3310/3330，其外觀與普通機殼分別不大，不過底殼背後印有「八達通」Logo，內側貼有八達通晶片。用法亦與普通成人八達通卡無異，在地鐵閘口前拎部手機「嘟一嘟」就可以過閘，而且靈敏度相當高。
八達通機殼售價為$190，本身無儲值額及不包括按金。換言之，不可像普通八達通卡般退卡及攞番已預繳的$50按金，畀錢之後個殼就完全屬於你。不過，機殼就同樣有$35備用餘額付款。
暫時八達通機殼只得1款粉藍色可以揀，而放響殼裏面的是成人八達通卡，用緊學生或長者八達通卡的3310/3330用家就無得用。
既然八達通手機人人受惠，坊間立即有不法之徒將官方機殼裏面的八達通晶片移往其他型號手機，我哋即刻踢爆佢哋點樣做手腳！
有啲用家覺得畀百幾蚊買多個手機殼唔化算，於是改機舖諗出將八達通劏開，將內裏的晶片移植到手機底殼，聲稱改裝後一樣可以過到閘。
（1）八達通機殼的貼紙上已寫明：「若標籤曾被改動、移動或損壞，保修自動失效」。另外，若八達通經人為損壞，更不能取回按金。
（2）無論是八達通卡、手表或者機殼，一經改裝後，各指定銷售地點如7-11、OK便利店都不會為用戶進行增值。
（3）據八達通卡有限公司表示，八達通卡屬於該公司財物，人為損壞屬刑事罪行，該公司會保留追究權利。
據手機維修店百利科技店主阿Kent表示，其實要將八達通卡劏開擺落部手機度並唔難，理論上只要將卡裏面的晶片移至其他手機便可。不過由於會牽涉到法律問題，所以基本上坊間舖頭都未必會明目張膽咁做生意。