美股超賣，前晚終於大反彈，杜指大升173點，技術走勢有轉機，但納指則仍偏弱，寄望美股反彈帶動港股，納指仍須改善走勢。港股噚日跟隨美股反彈，趙飛雲低吸長實（001）輪計劃又要押後。沽咗貨嘅佑威（627）逆市跌多兩格，收0.67元。如果跌落0.65元附近守得穩，會考慮撈番啲。重鋼（1053）1.12元支持力強，有博反彈價值。
最近換咗老闆嘅光通數網（155），下周一除供股權（2供1，供股價0.018元）後，大家不妨望多兩眼。趙飛雲聽聞，光通數網呢位新主長袖善舞，喺佢領導下，間公司一定唔會寂寞。
據聞光通數網正密鑼緊鼓，籌備開展新業務，就係打入內地嘅互聯網虛擬私人網絡（VPN）市場。VPN係點對點通訊服務，遲早取代傳統專線服務，發展潛力極大。目前內地認可VPN供應商只有5家，1年營業額逾10億元，過去幾年每年增長率均在3成以上，而且毛利甚高。
光通數網昨收0.017元，企得都幾穩。趙飛雲唔想供股，所以有睇冇買，下周除權後若見股價跌啲，不妨趁低買些少短炒。
趙飛雲