三十七歲洪自強，日前與三十三歲妻子陳賢慧回鄉探親，途中遇上交通意外，兩人不幸喪生，遺下年老母親李婆婆帶着僅兩歲半長孫洪卓謙傷心欲絕，更為無力殮葬兒子及媳婦而感到彷徨。蘋果日報慈善基金即時從「殮葬專戶」撥款，助李婆婆辦理他們的身後事，解其燃眉之急。
六十歲的李婆婆哀傷表示：「呢兩日卓謙一瞓醒就扭計搵媽咪爹哋，我惟有同佢講：『你媽咪爹哋返咗工，一陣就返嚟。』卓謙重咁細，好多嘢唔明白，我惟有暫時𠱁住佢，等佢大個啲至解釋佢聽！」
小卓謙雙親，日前在國內乘電單車往福建漳浦探親途中，遭貨車撞倒不治；當時隨行的卓謙，被撞傷頭部及右眼，一度需留在內地醫院接受治療。訪問期間李婆婆看着熟睡的孫兒，柔聲說：「發生咁大件事，尋日至帶卓謙平安返嚟香港，令我身心都覺得好攰。不過好彩卓謙身體已經無乜大礙，醫生話佢受傷嘅頭骨會慢慢生番，而兩隻眼嘅視力完全無受影響。」
在車禍中猝死的洪自強夫婦，生前分別任職搬貨工人及辦公室信差，刻苦耐勞。李婆婆提及兒媳兩人，黯然歎道：「阿強好孝順，雖然呢幾年賺錢唔多，又結咗婚有頭家，依然每個月畀成千蚊供養我；新抱阿慧亦好顧家，外家喺鄉下靠耕田生活，一向好窮，平日佢就盡量慳錢寄畀父母。𠵱家兩公婆去得咁突然，最慘淨番個仔重咁細，諗起都心酸！」
刻下，李婆婆更為缺錢支付阿強及阿慧的殮葬費而憂心忡忡。「殯儀館話呢件係慘事，又見我咁困難，已經講明只收一份殮葬費。但我冇積蓄，另外兩個仔女收入好少，都幫唔到屋企，所以希望大家捐錢畀我應急。」在社工協助下，李婆婆已向社會福利署申請殮葬津貼及綜援金，有待審批。
蘋果日報慈善基金了解李婆婆苦況後，即時撥款二萬元，助她辦理亡兒及亡媳的殮葬事宜，紓緩其經濟壓力。
捐款編號：C0517
為援助經濟緊絀家庭辦理殮葬事宜，蘋果日報慈善基金特設立「殮葬專戶」，援助有需要人士在殮葬費上的負擔，請讀者繼續捐款支持。
捐款編號：A470
暖流熱線
電話：29908688
傳真：23702192
電郵：
網址：