唉！原來唔止紅顏薄命，連靚仔都一樣，好似英格蘭隊長碧咸咁，喺前日場歐冠盃，俾拉科嘅德舒拿踢斷咗左腳跖骨，要唞六至八個禮拜，打唔打到世界盃都未知。
雖然拉科嗰邊由球員至教練都話唔係特登收碧咸檔，不過佢哋喺首回合已經有查斯坦雙腳飛鏟碧咸，前日又到德舒拿勁鏟佢，真係令人懷疑佢哋咁做嘅出發點。
重有，碧咸唔知係咪前世同阿根廷人有仇，喺九八世界盃決賽周對阿根廷時，佢俾阿根廷中場施蒙尼辣㷫咗被罰紅牌，幾乎成為千古罪人；之後洗心革面，諗住喺今屆決賽周發圍，點知就俾同樣係阿根廷人嘅德舒拿收檔，唔通德舒拿咁愛國，諗住幫國家鏟除強敵，等佢哋喺決賽周F組好踢啲？
喺皇馬對拜仁嘅歐冠盃八強次回合，喺皇馬領先拜仁一比○時，費高無端端同球證吵嘢，搞到被罰黃牌，下場停賽。當時我求大俠都好奇怪點解費高要咁做，不過當我翻查資料，知道皇馬喺四強首回合要作客巴塞時，就完全明白晒。鬼咩，費高次次重返巴塞都俾巴塞嘅球迷又鬧又掟嘢，可能佢唔想返去，咪出此下策囉！
講開皇馬對拜仁場波，最令我求大俠失望嘅，就係拜仁嘅後衞連基。事關拜仁失第二球，佢要負好大責任，當時佢本來嘜緊皇馬前鋒魯爾嘅，點知佢塊面中咗魯爾一踭之後，就好誇張咁成個自己禁區，由得魯爾傳中，結果
效力英超聯球隊列斯嘅後衞活基治無啦啦俾人「伏」，搞到提早「收咧」，呢單嘢認真耐人尋味。計我求大俠話，九成係活基治之前同保耶涉嫌毆打亞裔青年案嘅餘波啦！或者有人唔服判得活基治太輕，所以咪「伏」佢囉！其實活基治本來係英球壇新星，𠵱家搞到咁都係怪自己唔生性。
速龍嘅飛人卡達平時喺球場上天不怕地不怕，但原來佢最怕嘅喺開刀。卡達噚日首次對傳媒開腔，劈頭第一句就話係做手術時一見到把手術刀就驚到面都青晒，就算第一次落場打NBA都未試過咁鬼死驚，佢重發誓話以後打死都唔再開刀。計我求大俠話當然冇人想開刀啦，但卡達差不多成「天殘腳」，唔開刀根治唔通等隻腳跛咩！