新菜牌：
吃出驚喜法國菜

遊戲節目中最經典的一環，要獎金定獎品？永遠最令人興奮又緊張，事關獎品有乜送？獎金有幾多？唔到最後一刻都唔知道，確實令人又驚又喜。若然將這分驚喜轉移到餐廳內，又會怎樣？位於跑馬地，經常有高官名人如李澤楷、梁錦松、梁朝偉、何超瓊等幫襯的TECA法國餐廳，最近就推出一系列春日法國菜式，當中更特設一個「是日驚喜組合」，今日食乜餸？唔到上枱你都唔會知，全由大廚當日以新鮮及時令材料度身訂做，款式日日不同，讓客人愈食愈驚喜。

記者：黃婉冰
攝影：黃子偉

餐前小點：煎瑞士式三文魚配魚子醬海膽汁
拍攝當日的餐前小點就是這款煎瑞士式三文魚，把挪威三文魚放在雪山洞內，用瑞士獨有的木材煙熏，將這種叫BalikSalmon的煙三文魚一面煎香，配以伊朗魚子醬、海膽汁、日本芥辣忌廉，分量不多不少，作餐前小點剛剛好。

試味報告： 瑞士式煙三文魚以鮮味為主，鹹味較輕，肉質幾滑，蘸上不攻鼻的日本芥辣忌廉，有陣陣芥辣香，亦有着忌廉的香滑，雙重味道，同煙三文魚很夾。

ImaginationbyChef：焗地中海鱘魚配黑菌韭黃忌廉汁
地中海鱘魚向來被人利用作生產魚子醬，大多數人都只會取牠的魚子而捨不得食它的肉，形成鱘魚肉身價矜貴，所以要懂得配搭和烹調，才不會浪費，鱘魚味道較重魚香，所以大廚特配同樣味濃的韭菜黑松露菌汁，經雞湯、忌廉一煮，散發出獨有香味，魚香汁香共冶一爐。

試味報告： 鱘魚肉質有些少似鮫魚，雖不算嫩滑，但魚味夠，黑菌韭黃忌廉汁味道很特別，有着獨特的清香，夏季當造的黑菌香氣比冬天的淡，較易令人接受。

舞台魅影$80
Opera是一種法式經典甜品，外層是黑朱古力醬，內裏是一層層的果仁、脆糖、生果、蛋糕片，外形有如一個舞台，因而取名Opera。為配合一人分量，這個舞台現已改為迷你舞台，旁邊是白朱古力慕絲，切開時會有熱情果或草莓汁流出，讓客人有驚喜。慕絲的軟滑與Opera的脆口，形成截然不同的口感。

食客推介
Casady試味： Opera入口已經食到香脆果仁同糖，口感幾得意；慕絲就啱啱相反，好滑，入口即溶，有清香生果味，最好係唔甜，好啱女仔食。

烤荷蘭犢牛膝配原汁$260 招牌菜
烤牛膝最大的賣點是沿用歐洲近十年最出名的做法──抽真空來處理，牛仔膝先用紅酒、雜菜、香料醃上三日，令調味料滲透每一個部分，把外層煎香，放入真空袋內抽出空氣形成內裏真空，再用18小時低溫處理，鎖住肉汁之餘又避免味道流失，將真空時抽出的肉汁煮成芡汁，令牛膝更原汁原味。

試味報告： 牛膝肉質非常嫩滑，嫩滑程度非常均勻，每啖都保持肉汁和鮮味，牛肉味不太濃，恰到好處，肉內一丁點脂肪都沒有，絕無油膩感。

美國龍蝦四色薈萃$160 記者推介
將龍蝦四個不同部位，配以四種不同烹調方法和汁料。上半身用豉油和忌廉醃過蒸熟；龍蝦尾做刺身，伴以日本芥辣忌廉汁；蝦拑剝殼用香片茶葉醃至入味再煙熏，淋上鮮番石榴汁；蝦拑後面部位，煮熟後用土耳其蜜棗、拔蘭地酒醃，又是另一種味道，最後補上有15年歷史的陳年提子醋，將味道推至頂點。

試味報告： 食這款龍蝦亦有先後之分，煙熏蝦拑有強列煙熏味，適宜殿後，刺身當然要趁新鮮食，混入忌廉的芥辣，香滑味較清，不會蓋過龍蝦的鮮味，蝦身鮮甜爽口，豉油與忌廉撞出獨特香味，味道各有特色，很豐富。

美國黑和牛肉冰片配野菜沙律及紫蘇汁$160
黑和牛是由美國純種牛與日本神戶牛混種而成的新品種，其特點是既有肉味亦有神戶牛肉的油花，暫時全港只得兩間餐廳有供應。把牛肉雪凍刨成薄片，用新鮮亞枝竹、沙律醬，雞湯打汁，伴以法國新鮮野菜及芝士片，聽大廚話，記得趁凍食！

大廚Angus試味： 黑和牛肉同美國牛肉唔同，入口有肉味但唔太強烈，適宜凍食，否則會較油膩。牛肉肉質爽滑，連同芝士、沙律菜同食，口感與味道都好好。

店名：TECA
電話：28336083
地址：跑馬地成和道45號一及二樓
座位：80個
付款方法：現金及信用卡（Visa,Master,AE,Diners,JCB）
營業時間：星期一到六中午12時至下午2時半，晚上7時至11時；星期日上午11時半至下午3時，晚上7時至11時；星期五、六酒廊營業時間延至凌晨2時。