之前落咗幾日雨，人都有啲翳悶，不過呢幾日天氣會好轉，不妨趁假期到郊外走走。陽光普照當然要有一副太陽眼鏡傍身，今次小記為大家介紹一系列時款太陽眼鏡，形態各有特色，最搶鏡當然係趣致可愛嘅動物造型，另外還有講求手工的款式，梗有一款啱你心水！
記者：許穗齡
攝影：周旭文、陳偉強
ImageGirl：Mon
法國品牌EyeDC出品的眼鏡，出名搞鬼細緻勇於嘗試，於今季新款中，最值得介紹就係呢款青蛙太陽眼鏡啦！用鈦金屬勾出嘅卡通青蛙不但形態生動，以鏡片做青蛙的大肚皮，就連佢都戴上一副青綠色嘅鏡片，設計真係夠晒新穎又有心思。
售價：$1,200（頂好）
同樣係由EyeDC出品，呢款魚仔形嘅太陽眼鏡一樣咁過癮。全鏡以膠金混合，鏡面用上一對魚的形態，平齊相對，有如一對接吻魚，設計無青蛙鏡咁顯眼，反而多咗一分含蓄，細看之下，眼鏡柄位都以波浪形來配合魚的主題，心思可見一斑。
售價：$1,200（頂好）
由藝術家的眼光看事物，通常都會加以概念化或美化，好似呢款由比利時品牌Theo出產嘅蝴蝶太陽眼鏡，就係一個好例子。眼鏡以紫色鈦金屬線條勾劃出一隻蝴蝶，線條優美婀娜，再加上淺紫色鏡片半連框的設計，令眼鏡更添動感。
售價：$1,600（頂好）
睇漫畫經常會有男主角為咗上堂睡覺，就喺眼皮上畫上假眼扮專心，估唔到現實生活真係有一款咁類似嘅眼鏡。鏡架以鈦金屬製，由法國IDC出品，先以藍色反光鏡片做眼白位置，再用黃色同款鏡片做瞳孔，再以硬身的鐵線紮在一起，戴上眼非常搞笑。
售價：$700（頂好）
晴天時太陽刺眼得令人不能正視，不過呢副太陽眼鏡嘅閃亮程度都有得揮。由EyeDC出品嘅漩渦形太陽眼鏡，鈦金屬架面鍍上一層帶有閃粉的橙色膠，在陽光直射下直情閃閃生輝，再配埋對比色藍色鏡片同眼鏡柄，當堂成個Sharp晒！
售價：$1,100（頂好）
今年喱士花大行其道，衫褲鞋襪手袋大家就見得多，連太陽眼鏡都有就真係估唔到。呢款英國CUTLERANDGROSS嘅太陽眼鏡，就係以兩層透明膠中間壓着一層薄薄的紅色喱士布，再配埋淺紅色嘅鏡片，屬喱士用品較另類而又有品味的選擇。
售價：$1,648（零一零）
OAKLEY向來專攻運動太陽鏡市場，雖然離夏天尚有一段日子，今季已急不及待率先推出滑浪專用嘅太陽眼鏡。寶藍色鈦金屬鏡框，再配郵票邊的鏡片，再加埋尼龍縛頭繩及掛頸繩，設計同以往嘅出品一樣咁時款，去沙灘或平日出街戴同樣咁有型。
售價：$1,815（零一零）
唔鍾意傳統膠架或鈦金屬框，你重有另一種選擇，就係呢款皮帶太陽眼鏡。呢款HISTOIRE嘅太陽鏡，賣點當然係以全真皮取代傳統鏡架，皮帶有淨啡色及銀色令面選擇，末端設有魔術貼以固定位置，無論用料或款式設計都與別不同。
售價：$1,552（零一零）
店舖資料
頂好眼鏡公司（23852777）
旺角豉油街福泰大廈二十四號A地下
零一零眼鏡店（29713870）
金鐘太古廣場西武二樓