每逢假期，就收到大量垃圾傳真，可能係一啲公司趁假期有空檔，搏命發傳真都唔定，大部份嘅垃圾，左丁山都一睇即棄，但呢日收到一張「徵求漢基國際學校公司債券」嘅傳真，睇落幾過癮。好多人想送子女入漢基國際（CIS），但一來要有債券（debenture），二來要面試，相當困難。不過如果冇債券就冇得講，所以有人要徵求。
呢張傳真列舉咗一啲會所會籍嘅二手價，大家唔知覺得貴定平呢？美國會，一百零二萬；深灣遊艇會，八十八萬；香港足球會，十八萬；九龍木球會，二十萬五千；清水灣鄉村俱樂部，一百零九萬；愉景灣高爾夫球會，一百二十萬；中華遊樂會，四十三萬；皇朝會，十七萬。雖然話經濟不景，會籍債券仍然有價，想入會威一威嘅，磅水就得。
如果唔想買，原來有啲可以畀月租，譬如澳門高爾夫球會，月租一千五百元；中山溫泉，二千五百元；愉景灣，七千元；清水灣，七千元；深圳高爾夫球會，三千三百元。以上各種價格，唔知真定假，不過既然傳真講明係二○○二年三月二十五日價格，當然有價講啦。
真係慚愧，上述咁多個會，左丁山全部冇資格，唔係會員，際此慳得就慳嘅時刻，亦唔想出錢買番一個半個會籍。只記得九七年之時，左丁山可以入香港足球會，當時要畀二十萬入會費，自己覺得太貴，唔肯入，現在二手價十八萬叫做跌咗一成咯。