小初噚日請經紀陳食晏，皆因佢上個月底推介小初買勝獅貨櫃（716）賺錢。當時佢話業績OK，會炒上配股，結果小初喺70仙樓下跟入，其後公司公布業績勁賺8000萬銀，升足7成，小初就喺１元附近沽咗。由於近期好少賺得咁多，所以心甘情願請佢食餐勁，鮑魚就鮑魚啦。
經紀陳話，由於隻股重未配股集資，稍後公司好似會再安排同基金經理和分析員會面，唔排除會在月底批股集資。一日未做完配股，勝獅股價仍然會頂住。
晏晝返公司，小初見勝獅個勢又真係幾靚，結果返轉頭又買咗少少，隻股噚日升9.7％，收1.02元，又創52周新高。
雖然小初上咗車，但唔知點解覺得次次返兜都唔多利是，所以都係諗住玩超短線，執到多少就走人。橫掂呢輪民企又好似掂番，連帶外資大行如大摩都幫歐亞農業（932）唱好，大把嘢玩唔使憂喎。
慕容小初