有「大騎樓」之稱嘅鍾慧儀，九二年因為喺美國洛杉磯嘅「NeimanMarcus」百貨公司行使假信用卡，以及喺九三年賄賂調查員而被美國通緝，後來佢返美國自首，被判入聯邦監獄服刑六個月。
到九九年九月初，鍾慧儀刑期屆滿出獄，自此之後，佢就銷聲匿迹，好似人間蒸發一樣。
不過，早兩個月馮仁昭個朋友去美國洛杉磯玩，竟然撞見鍾慧儀，最搞笑嘅就係，鍾慧儀當時同佢家姐逛緊百貨公司，而間百貨公司，就係當年鍾慧儀行使假信用卡嗰間「NeimanMarcus」。
馮仁昭個老友話，鍾慧儀成個人好似發脹咁，大咗成個碼，如果唔仔細啲望，分分鐘真係唔認得佢。
馬詩慧（Janet）噚日帶埋仔仔Kadin一齊出席《精靈BB激智玩意》，雖然Kadin只係兩歲幾，但Janet就話佢同爹哋王敏德一樣好鍾意飛機同高爾夫球，有時喺天上見到飛機，都會大叫daddy。問到Janet老公之前同傳媒講話想再生多個，Janet即刻講笑咁話：「同邊個生呀！我冇聽聞過，其實第二同第三胎都係意外，所以我覺得一切都順其自然啦！」
黃伊汶（Dior）近日為港台教育電視節目拍嘢，係關於減壓同如何解決問題嘅節目。
Dior有自己一套減壓方法，就係狂食嘢，佢話：「其實我都遇到好多壓力，我會選擇狂食嘢嚟紓緩唔開心嘅情緒，食咗一餐勁之後，胃部會得到好大嘅滿足感。」
哥哥張國榮日前接受日本雜誌《PopAsia》訪問，佢表示已經正式辭演徐克執導嗰套新戲《三少爺的劍》。由於哥哥親自執導嗰套戲都就嚟要開拍，但徐克重未定到《三》嘅最後人選，所以哥哥惟有辭演。
汪明荃噚日喺上環市政大廈綵排舞台劇《如夢之夢》。阿姐表示今年係佢從影三十五周年，所以希望做啲特別嘅事作為紀念。
阿姐除咗舞台劇同遲啲開鑼嘅粵劇外，佢重會再拍已經十幾年冇接拍嘅武俠片，佢話：「咁特別當然要做啲嘢，粵劇對手換咗李龍唔係羅家英。」
台灣F4成員言承旭同大S自從拍完《流星花園》之後，就好耐冇見過面，直至前晚佢哋兩個就喺台灣電視節目《娛樂百分百》再次碰頭。喺節目度，唔知大S係咪怕男友藍正龍呷醋，所以經常強調佢同言承旭好耐冇聯絡，言承旭重喺個節目度顯示佢嘅手臂肌肉㖭！
樋口明日嘉日前喺台灣拍攝日本杯麵廣告時遇地震，雖然佢喺日本經歷過地震，但重有啲驚。樋口表示呢次拍攝頗為辛苦，除咗四磅重嘅頭飾令佢要經常服食頭痛餅外，如廁亦係一大問題，佢話：「第一日足足忍咗十五小時，第二日重冇得去，因為地方太荒蕪。」
張天愛噚日隻身出現中環，佢話聽日就會出發去內地，接受上海時裝協會頒發畀佢嘅成就獎。
問張天愛心情如何，佢話：「其實都冇乜感覺，只係覺得好大壓力，唔通攞咗獎就唔使做咩！不過當年我自己咁後生攞傑青，我都已經好有壓力。」