港股噚日跟美股反彈，升101點，收報10744，完全冇挾淡倉嘅味道，究竟係因為大戶期指以好倉為主，所以冇得挾，還是大戶趁反彈繼續收集淡倉，以致限制大市升幅呢？Cookie同阿虎講，其實兩樣都唔係，實情係投資者對港股冇興趣，一於賴得理。呢種死水一潭嘅狀況，重慘過恒指跌至6000點。
第一龍浩（875）今日將與清華國際技術轉移中心正式簽約，成立一間合營公司，而炒家噚日已經開始埋位，開始有動作，股價噚日只升2.36％，但今日可能會有慶祝活動搞吓，炒味將更加濃啲，可以留意。
中旅國際（308）前日公布純利6.51億元，增長3.3倍，但股價噚日逆市倒跌5.33％，而且沽壓唔細，成交達9242萬元。ｉ師傅話此股蟹貨唔少，每當有好消息出現都有大戶出貨。另外，母公司又傳經常趁高沽貨，然後行使認股證平價增持番，所以就算盈利表現不俗，股價都難以上升。
電視廣播（511）近期經常傳出因為銀河搵唔到策略性投資者而放棄收費電視牌照，但被市場理解為利好消息，因為此舉可減少電視廣播投資風險。不過阿虎又同時聽到，銀河已覓得投資者入股，可以順利發展收費電視業務，所以多間大行不約而同將其投資評級調高。
不過到現時為止，邊單傳聞至係堅料重未能確定。此股噚日一度急升至40元，沽壓即大增，回至38元收市，成交多達1.29億元。阿虎懷疑大戶可能已順利出貨，消息是真是假或者已經唔重要。
阿 虎