人類對家居愈來愈講究，話晒叫安樂窩，當然想舒舒服服啦！愛屋及烏嘅你，必定會為小寵物的家居環境而煩惱。今次小記就為各位倉鼠迷介紹一下近期新款嘅籠屋，設計新穎又有創意，再加埋其他遊樂配件，小倉鼠一定樂透了。
記者：許穗齡
攝影：林栢鈞
小動物上太空其實唔係乜嘢大新聞，不過今次你只需安坐家中就可以同小倉鼠一齊分享穿梭太空嘅奇妙經驗。呢款以太空作為主題嘅倉鼠籠，主要以膠製，某部分更以帶閃粉的硬膠製成，甚有太空感覺，而籠內更附有一個夜光轉輪，設計非常認真細緻。
尺寸：
主籠 長40cm、闊25cm、高22cm
飛船 長23cm、高24cm
轉輪 直徑22cm
售價：
主籠 $160
飛船 $72
轉輪 $70（寵物城）
踏入二十一世紀，小倉鼠當然要緊貼潮流，倉鼠籠都要玩吓Cyber設計。倉鼠籠以紫色及綠色半透明膠為主，睇落的確Cyber味十足，主籠以雙層式設計，養多幾隻都唔怕打交，頂部更設有管道通往小塔，小倉鼠又多一個唞氣空間。
尺寸：長28cm、闊23cm、高60cm
售價：$225（Q-PETS）
小記一直都想將客廳布置成日本和Feel，不過當然得個諗字，既然現實做唔到，不如就等小倉鼠幫手實現啦！和式倉鼠籠以膠製，內附一個轉輪和一條管道，最特別當然係內裏以日本家居的布置，無論牆壁同家具都做到十足，小倉鼠必定住得舒適。
尺寸：長37cm、闊28cm、高24cm
售價：$250（Q-PETS）
養開倉鼠嘅朋友都知道小倉鼠有跑圈嘅習慣，所以通常倉鼠籠都會裝有一個轉輪畀佢運動，小記就建議不如買番架車畀佢！呢款膠製嘅跑車並非一般嘅轉輪，只要小倉鼠在轉輪上跑，跑車就會由轉輪推動，小倉鼠就可以如踏單車咁自己通屋走，又唔怕被人踩親，既安全又好玩。
尺寸：長30cm、高17cm
售價：$120（寵物城）
別墅小記就真係買唔起，不過幫小倉鼠買就重負擔得到。呢款膠製別墅分上層及下層出售，下層連屋頂可放於籠中，而上層則附有膠扣可掛於籠中，更連樓梯可讓倉鼠上落，兩間買齊更可以合併成兩層高嘅小別墅，做小倉鼠真係幸福！
尺寸：
（上層）長20cm、高12cm
（下層）長13cm、高12cm
售價：
（上層）$46
（下層）$36（寵物城）
玩咗成日，小倉鼠都有攰嘅時候，都要坐低歎吓茶小休片刻。呢款膠製嘅兩座位咖啡座，不但有太陽傘作遮蔭之用，櫈底更係小倉鼠最喜愛匿埋的地方，其實要佢哋兩隻坐定定就無乜可能，不過勝在幾搞笑，當作籠中的擺設實在不俗。
尺寸：長18cm、高18cm
售價：$28（Q-PETS）
倉鼠玩意其實唔係只有倉鼠的份兒，主人絕對可以有份參與，好似呢款膠製遊樂設施就全靠主人的創造力及技術，將一塊塊正方形板、管道及滑梯等砌成一個小小遊樂場，一盒有二十多塊正方板，重可以不時轉轉款式逗小倉鼠開心，主人同倉鼠都一樣咁好玩。
尺寸：每塊正方板6cm×6cm
售價：$68（Q-PETS）
店舖資料
寵物城（26260406）
何文田太平道2號地下及一樓
Q-PETS（24050616）
荃灣大壩街49-51號地下