碭山梨係近兩、三年至由河南安徽打入本港市場，佢Size都幾大，外形圓而色澤帶青綠，表皮上有細而幼嘅啡點，食味清甜，肉質鬆化，水分多，大大個都幾抵食，十蚊份有五個。
碭山梨一到夏天即蒲頭，家陣已經可以喺部分果檔搵到佢，有興趣可買份返去食，味道唔錯，而且價錢經濟。我肥媽係水果擁躉，當然唔會錯過啦！
以前喺凍肉舖買到嘅燒賣大多數只有豬肉燒賣，後嚟陸續有不同口味嘅燒賣推出市面，而且一款比一款更有心思。
呢種顏色咁搶眼橙黃相配嘅燒賣，係加入咗較矜貴嘅龍蝦肉在其中而製成。雖然龍蝦分量唔多，但足以令燒賣變得更惹味，更美觀。
我肥媽間唔中都會買呢啲凍肉返屋企，煮畀屋企啲小朋友當下午小食㗎！
九肚魚其實好多時都可以買到，但唔同時間買到嘅九肚魚都會有分別。
最近嘅九肚魚大約賣十二蚊一斤，賣得呢個價錢嘅九肚魚都比較大條，約有六吋長。大條九肚魚肉質更為肥美嫩滑，千萬唔可以錯過。不過九肚魚味帶腥，最好以薑辟腥再煮。
文：肥師奶