美國科技股頻傳發出盈利警告消息，令市場氣氛異常審慎，喺咁嘅情況下，港股又邊度有運行呢？盈富（2800）賣得出就奇。恒指收10643，跌90點，其實都叫做跌得少，唯一可喜係成交增加至60億元。
泰興光學（389）噚日出現一手4000萬股大手成交上板，成交價為0.63元，全日成交金額增至2824萬元。其實此股一向成交唔多，近兩日才大幅增至數百萬股。據聞已經有班炒家埋班想做上去，方便配股咁話，噚日有4000萬股據聞同莊家射倉有關。泰興今年年初頻頻回購，但升至0.60元後就停手，噚日收市價僅0.65元，若以現價配股，對公司冇咩好處。
噚日精電（710）又學人發盈警，結果股價下挫14.8％，成交達9782萬元。ｉ師傅話，早前市場頗為看好此股復甦前景，如今突然話要為存貨作出額外撥備，實在令芬佬措手不及，所以噚日有唔少基金沽貨。
據聞撥備額可能高達5500萬元，不過市值單日唔見咗超過3億銀，今次拋售似乎過咗火，但有消息話芬佬換馬行動重未完成，後市仍需小心。
世茂中國（649）噚日勁升19.4％至0.80元收市。但大家要留意，此股之前供股供僅獲78.17％認購，大股東包銷其餘供股股份，令持股量升至77％，需要進行減持，因此不宜高追。上次供股價0.65元，即係話大股東現價沽貨都有23％利潤。
阿 虎