上海幫嘅股仔，有時真係幾難玩．好似買咗豪宅天比高嘅世茂中國（649）咁，連續兩次供股，搞到人人都驚唔玩時，大股東就成功增持，然後股價即刻炒上，搞到一眾小股民如小初頭暈眼花。
世茂兩次供股，每股作價都係65仙，由於當時剛興起炒大陸民企富豪概念，所以第一次供股成功獲2倍認購，點知話口未完即刻供第二次，結果只得78.17％認購，真係咩貨都收乾收淨。
如果唔係收乾哂，世茂噚日就唔會有力炒上，全日升19.4％，收80仙。睇牌路好明顯係左手交右手，反映貨源歸邊。
經紀陳話，由於世茂供股唔足額認購，要大股東包銷，結果揸到77％，一個月內大股東要減持，以維持公眾持股量，所以一為神功，二為弟子，點都要炒上先至散貨。
公司將在4月19日公布業績，以上次中期重蝕緊錢，睇怕全年都唔慌好睇。
慕容小初