繼「部屋電腦」之後，東瀛又再吹來「部屋Hi-Fi」之風，因為aiwa打算喺今個月推出一部功能勁強嘅MiniHi-Fi──XR-V10MD，佢非常罕有哋將DVD、AudioCD、MP3CD播放同MD錄播嘅功能撈埋一齊，簡直就係將「部屋」（日文譯作房間的意思）嘅所有視聽享受一網打盡，不過最正都係佢個外形，香港狹窄嘅居住環境，啱晒！
記者：朱崇德攝影：陳盛臣
以往要喺房內同時享受DVD電影同CD、MD影音雙重享受，就要用一部DVD機再駁上MiniHi-Fi先至玩得齊，不過當中嘅難度就係勁嘥位！aiwa最近打算喺日本引入呢部XR-V10MD正好解決呢個問題，喺日本MiniHi-Fi界，佢係比較罕有地同時整合咗DVD播放、AudioCD播放同MD錄播功能於一身嘅MiniHi-Fi組合，可以用「部屋Hi-Fi」來形容。
機身外形設計幾慳位（L47×H16.9×D23.4cm），簡直同一般MiniHi-Fi冇分別，好難想像佢竟然整合咗DVD播放功能喺裏面；XR-V10MD基本上有齊一般嘅DVD播放功能，例如現時較流行嘅光纖影像輸出、dts同杜比數碼效果都全部玩齊，至於大家最關心嘅區碼對應問題，暫時已知可以完全對應香港嘅3區DVD碟，其他區碼則有待官方進一步公布。音效方面，加入咗aiwa自家嘅QSurround系統，基本上兩隻跟機喇叭（共20W），都可以模擬出幾真嘅前、後置環迴立體聲效果，而且機背部分重預留咗重低音SubWoofer插口，等你可以隨時Upgrade。
MiniHi-Fi音響部分，佢嘅功能都算玩得幾齊，可以播放到AudioCD、MP3CD同VideoCD等多種不同格式光碟，當中尤以MP3CD最方便，只要喺網上Download一啲MP3歌仔，然後再將佢燒成CD-R?RW，都可以Play到。MD就有齊現時最流行嘅MDLP2同MDLP4錄播功能，AudioCD翻錄過MD時，重有2倍快錄，功能真係幾齊全。
查詢：愛華客戶服務中心
地址：銅鑼灣希慎道1號1504室
電話：28826901
同場加映
aiwa啱啱推出咗一部多合一功能新機CSD-EL200，佢最過人之處，係將鬧鐘、AudioCD、收音機同錄音帶等功能四合一。AudioCD可以對應一般音樂CD，重支援埋自己燒製嘅CD-R/RW（不對應MP3CD），照顧都幾全面；另外加入了現時較少有嘅錄音帶錄播功能，唔好以為冇用呀！嚟緊4月30日就係香港中學會考嘅英國語文科聽力測驗，考試想及格唔聽多啲PassPaper嘅錄音帶又點得呀！收音機可預校30個電台，都算符合基本需要。
鬧鐘就最正，響鬧聲音有蜂鳴、CD、收音機同錄音帶等多種不同選擇，最厲害都係佢拍息之後5分鐘，重會重複響鬧，簡直就係「爛瞓人士救星」，價錢方面，新機開賣價為$648，以咁多功能計算，真係幾鬼抵！
小記收到風，日本嗰邊好多影音大廠，都打算開發呢類又慳位，又整合多樣影音錄播功能於一身嘅部屋Hi-Fi，好似港人較為熟悉嘅SONY，亦打算喺呢幾個月內推出一部DVD、MD同AudioCD功能幾合一嘅機種──CMT-M700DVD，據聞呢部機有可能會對應5.1聲道效果，不過價錢及發售日期則未定。