惡佬明一位手下突然患上失眠症，返工時精神恍惚，但又唔敢請假，理由大家都明啦，呢個時候，邊個打工仔敢開口請幾日病假呀。惡佬明驚佢唔掂，親自捉咗佢去睇醫生，醫生同佢驗血壓，一驗就知呢位仁兄血壓高，於是開啲血壓藥、鎮靜劑畀佢，重勸佢唔好咁緊張，凡事睇開啲。如果公司要裁員，都唔好咁驚青。
現時唔少人患上高血壓，皆因煩惱事多，工作壓力大，四十幾五十歲嘅朋友染上高血壓，呢半年來，左丁山已經知道有幾位，若果大家偶有失眠，最緊要去睇吓醫生先，有時學吓張永霖嘅小智慧，紓緩神經，大有好處。
投資D就話有時睇到一啲數字，想唔緊張都唔得，好緊張通縮持續也。何出此言呀？原來佢哋間辦公室招標搵清潔工，幾千呎嘅地方，連打掃、吸塵、抹枱、接電話、運走垃圾，每工作天一次，你估要幾多錢一個月呢？最低標價就係兩千蚊。投資D話：「兩千蚊一個月，平到我唔信，清潔工人賺到幾多呀？呢棟寫字樓內，間間公司都要求上午九時前做完工夫，就算一個工人清潔幾間公司，都唔係三頭六臂噃。」
左丁山係唔知道一斤米要幾多錢嗰類人，所以唔知道二千蚊清潔費算唔算貴，或者係平到暈，投資D雖然認為過分便宜，但佢身為投資經理，相信市場競爭價格，亦都唔會自動加價。