最近EMI同黎瑞恩（小恩子）出咗隻新碟《Dreamscometrue》，入面嘅主打歌叫《雲上的日子》，而佢以前所屬嘅環球唱片，就喺一個禮拜前突然出咗張小恩子嘅精選碟《理想的日子》，擺到明互撼啦。
不過小恩子張新碟只得十首歌，HMV價賣成一百一十五蚊，而精選碟就有兩張CD連VCD，合共四十七首歌，售價就低至六十五蚊，價錢相差成半咁滯，但精選碟入面就出咗小恩子起碼喺五年前影落嘅沙灘少女look照片，𠵱家睇番真係有啲「娘」。
環球方面就話同小恩子出精選好有誠意，因為碟中有首歌叫《問候》，係小恩子入行初期同BMG錄嘅唯一一首歌，環球重特登同BMG借歌㖭，而碟名《理想的日子》，就係寓意祝福小恩子將來有理想的日子咁話。
楊思琦最近趕緊拍《繾綣仙凡間》，第一次擔正做女主角，思琦梗係全力以赴。本來喺選華姐時，因為騎駱駝整親條頸嘅思琦已經好鬼驚巨型四腳動物，但導演突然間要補拍一場騎馬戲，佢話：「真係好驚，上次整親之後已經有陰影，點知突然要騎馬，惟有頂硬上，好彩有師傅（江華）同我一齊騎先至順利完成。」
韓國人氣女星金喜善早幾日秘密去咗台灣，為韓國服飾「SoBasic」拍廣告，當佢出現喺台北通化街肯德基家鄉雞店嘅時候，即刻俾fans認出。而金喜善喺台北街頭拍廣告，就一共換咗十幾套衫，當工作人員發現有台灣記者偷拍後，重話要拆菲林。
梁朝偉繼鍾麗緹、李嘉欣同鄭伊健之後，喺今個月十六號都會飛去韓國搵食，同最新出爐嘅韓國青龍獎影后張真英合作拍MV。
韓國歌手好興重金禮聘當紅嘅藝人幫佢哋拍MV造勢，偉仔今次拍嘅係新人TheName嘅MV。聽講此MV會同一般談情說愛嘅古仔好唔同，偉仔重會同影后張真英有連番武打激戰㖭。
張柏芝同謝霆鋒雖然日日俾記者跟住，但都忍唔住要見面，呢啲就係熱戀中嘅情侶行為。馮仁昭知道柏芝經理人公司中國星嗰邊唔多鍾意柏芝同霆鋒拍拖，驚影響柏芝嘅形象，所以佢哋安排柏芝嚟緊拍好多電影，亦接咗好多其他工作，等柏芝掛住做嘢冇時間拍拖，所以柏芝話嚟緊到2003年都冇假放，一啲都唔出奇。
陳勳奇個女陳杏妍，佢個偶像原來係內地演員胡兵。話說陳杏妍早排以幫一份周刊做客席記者為名，走去訪問偶像胡兵，聽講佢捉住胡兵影合照嗰陣，隻手喺人哋大髀度摸嚟摸去，嚇到胡兵面都青埋。
徐若瑄同日本人氣組合V6嘅三個成員森田剛、三宅健同岡田准一，下個月四號會做台灣金曲獎嘅頒獎嘉賓，頒發團體組合獎項。V6曾經喺台灣開過兩次演唱會，而下個月三號佢哋會先去高雄，出席歌迷會聚會，相信台灣嘅V6fans一定會好開心。
莫文蔚加盟新力嘅第一張唱片，其中一首歌《那可不一定》，就搵咗王力宏幫佢寫，早幾日王力宏重去埋錄音室，幫莫文蔚監製呢隻歌，佢重親自幫隻歌rap咗一段，而錄音嗰日，王力宏重叫咗pizza同埋越南菜去錄音室，同莫文蔚一齊食。