立法會噚日復會，八方知道好多議員趁長假外遊，不過似乎運氣麻麻，甚至有人玩到掛晒彩返港。好似蔡素玉噚日就要着住對涼鞋返立法會，原來佢假期去大陸宜興行山時扭親腳，去到當地醫院照Ｘ光，先知有骨碎咗，要打石膏、篤枴杖同坐輪椅。不過原來重有下集，就係「叉燒」（蔡素玉）死撐要繼續行程，想同埋阿媽、姪仔姪媳一行人再去普陀山拜觀音，真係估唔到佢咁神心。不過撞啱觀音誕，船票一早賣晒，叉燒竟用苦肉計，同當地人講：「我哋成團人老幼傷殘大肚樣樣齊，唔該做好心讓啲船飛畀我哋吖！」咁又得咗。
而另一位受害者就係馬逢國，佢同屋企人去咗海南島三亞享受陽光與海灘，點知游水搞到眼球微絲血管感染不特止，連耳膜都穿埋，失去一半聽力，都咪話唔得人驚。
E-mail：