四十八歲的阿清，年前與夫離異後，與兩名年幼女兒展開艱苦的單親生活，近日三口喜獲房屋署編配公屋，終可擁有一個安穩居所，然而隨之而來的沉重搬遷開支，卻教依靠綜援金維生的她感到苦惱。
「其實之前房屋署都畀過一個單位我哋，不過我因為冇錢搬屋而放棄咗，如果今次再唔搬，唔知要等到幾時先有機會，加上𠵱家住呢度地方好窄，品流複雜，兩個女慢慢長大，我希望畀個好啲嘅居住環境佢哋。」阿清說。
站在阿清旁邊的幼女聽到母親談及新屋的事，亦難掩興奮神色說：「我好鍾意間新屋呀，因為大過呢度好多，呢度車聲好嘈㗎，有時嘈到瞓唔着㖭。」
阿清與前夫於八八年結婚，育有兩名現年八歲及十二歲女兒，初期雙方相處融洽，阿清以為找到終生伴侶，豈料年前阿清發覺其夫另結新歡，導致兩人關係破裂，阿清更曾遭人虐打受傷，她為兩名女兒着想，無奈之下只得選擇離婚，三口搬到一個唐樓套房居住，依靠綜援金維生。
「離婚唔單止對我打擊好大，兩個女亦都受到好大影響，有邊個唔想一家人開開心心生活，𠵱家佢哋冇咗爸爸，真係好痛苦。」阿清含着淚說。
為了提供一個良好的居住環境，好讓女兒健康成長，阿清四年前入紙申請公屋，近日終獲批核，她與女兒看過新居，感到十分滿意。然而，阿清算過度過，知道單憑一份微薄綜援金，根本難以負擔龐大的搬遷開支。
「我已經每個月盡量喺啲伙食費度慳，死慳死抵都只係慳到少少錢，淨係夠交租金按金，重未計水、電、煤氣按金同埋其他雜費，新屋連鐵閘都冇，裝一個都要唔少錢，𠵱家都唔知幾時搬得。呢幾日我都為咗呢件事瞓唔着。」阿清皺着眉說。
鑑於社會福利署現行條例，領取綜援金的單親家庭不會獲發搬遷津貼，蘋果日報慈善基金了解阿清的困境後，即時撥款八千元，助她繳付搬遷各項雜費。
捐款編號：C0516
暖流熱線
電話：29908688
傳真：23702192
電郵：
網址：