鍾情舒淇靚嘴夠野性
Sammi護唇良方成日舔佢囉！

鄭秀文（Sammi）和化妝師Zing日前一起合作拍攝新一輯MaxFactor不脫色唇膏廣告。問Sammi有何護唇心得，她笑說：「成日舔佢囉！」

鄭秀文（Sammi）日前拍攝了新一輯MaxFactor不脫色唇膏電視廣告。今次更找來化妝師Zing作拍檔，一起粉墨登場，齊齊介紹九種顏色的唇膏，電視廣告明天便會播出。

首次幕前合作
廣告日前於西貢一片場進行為期兩日的拍攝，雖然Sammi與Zing已是老友鬼鬼，兼合作無間，但由於二人是首次合力在幕前演出，他們在拍攝初期竟然有點緊張。
Sammi接受訪問時說：「我同Zing係已經識咗七、八年嘅好朋友，所以起初對住鏡頭就覺得怪怪哋，反而有啲緊張，但後來大家都好快上手，我覺得今次係一個好值得紀念嘅日子。」
問Sammi覺得自己為何會得到MaxFactor的垂青？她說：「我嘅唇形都幾靚㗎，夠簡單，唔厚唔薄。

讚李美鳳性感
「但我比較鍾意厚啲嘅唇，以前我鍾意李美鳳，佢個唇好誘人，好性感，𠵱家我就鍾意舒淇，夠野性。」
而一向貼近潮流的Sammi，更大讚今次新推出的一系列新顏色唇膏，她說：「佢哋啲顏色好靚，尤其係淺粉紅色，而佢哋唔甩色，好方便。」身為唇膏代言人，Sammi可有護唇秘方？她笑說：「成日舔佢，同成日用潤唇膏囉！」
採訪：羅慧敏
攝影：陳志嵐