唔知係班國足對自己太有信心呀，定係低估咗其他球隊嘅實力，唔係點解佢哋班人會喺一個公開場合上咁語出驚人。
世界盃快到，國足梗係要講吓自己嘅意見，但我求大俠冇諗過佢哋原來咁識講笑。郝海東居然咁講：「我唔明白好多人淨係鍾意問中國隊入唔入到十六強，點解唔問吓我哋入唔入到八強。」曲波重好笑，竟然話要射爆巴西嘅大門。
我求大俠聽到後，覺得佢哋會唔會係因為飲大兩杯亂噏嘢呀？事關中國連十六強都未必入到，又點講入八強呀？重有呀，中國嘅攻力有幾強，大家心照啦，點入巴西波呀！
不過所謂「只要有夢想，凡事可成真」。中國班球員係就係癡人說夢話，但起碼證明佢哋好有決心，希望可以喺世界盃攞到好成績。我求大俠身為龍的傳人，到時梗係會瞓身支持中國隊啦！
體育界嘅權威媒體ESPN噚日選咗魔術嘅麥基迪做NBA今季嘅MVP，我求大俠雖然都好欣賞呢個後起之秀，但喺ESPN唔可以當傑特同奧尼爾係流料，佢哋今季表現都同樣技驚四座，而且以NBA嘅保守作風，絕唔會選一個只得二十二歲嘅花靚做MVP，我睇「基仔」最快要浸多兩、三年先至夠斤両做一哥。
利華古遜今屆喺歐冠盃打得咁好，但對球迷同埋球會嘅高層嚟講，就唔知係好事定壞事。事關佢哋除咗波勒肯定下屆過檔拜仁外，其他打得好嘅球員好似
利物浦喺前晚失咗四球畀利華古遜後，真係乜嘢數據都俾人破晒。事關利記賽前喺十五場歐洲嘅作客比賽上保持不敗，兼且喺今屆十五場歐冠盃賽事淨係失咗八球，有咁強嘅數據支持底下，邊會諗到佢哋輸咁大鑊㗎。不過，足球比賽就係咁，有時唔可以吓吓講數據，重有考慮埋作客環境因素，真係人算不如天算！
奧雲、希斯基同謝拉特喺舊年幫英格蘭打殘德國，但喺前晚場歐冠盃就謝晒，間接令利記出局。查實佢哋三個家陣咁沉，唔單止搞弱利記，重影響埋英格蘭㖭。係人都知佢哋三個係英格蘭嘅主力，而英格蘭喺世界盃入咗死亡之組，如果佢哋到時狀態重係咁差，我求大俠真係擔心英格蘭會喺首圈出局。
求驗客手記逢星期一至五刊出
E-mail: