港股噚日雖然未有大幅下瀉，主要係因為中東局勢有緩和迹象，但呢次只係因以色列肯撤軍，但唔代表巴人肯放少兩個人肉炸彈，若果以色列再受襲，情況可能再有轉變，所以盈富基金（2800）批貨仍冇人吼，噚日又係1個單位都賣唔出，與新樓盤銷情比較簡直係天壤之別。
恒指升10點，收10733，成交萎縮至不足50億元，好多經紀成日坐喺大利市機面前無事呻吟兼吊鹽水。
雖然如此，二三線仍各自各精采，不過近期升勢大勇嘅自然美（157）似乎開始腳軟，股價升至1.09元有回吐，收市雖仍企穩於１元以上，但據聞幕後人士已開始散貨，所以後市應難以再大幅上升。此股以每股0.55元招股，現價差不多有90%升幅，都夠皮啦。
噚日光通信（603）勁升近20％，成交達5400萬元，下午才佔大部分成交，擺明係想托價。此股有隻認股證607將到期，每股行使價為0.36元，任你點托都好難托到上0.36元，挾高股價唔通有其他原因？黑客叫阿虎要留意光通信，一定有好戲睇。
好耐都冇乜表現嘅航天系有異動，航天科技（031）噚日急升6.89％，收報0.62元，而航天通信（1185）亦升2.4％，收報0.425元，但成交只係一般。
Cookie話，到現時為止重未知道此系有乜動作，不過自從管理層大換班後一直冇乜新搞作，照計現在都係時候做嘢，挽回投資者信心。 阿虎